ԵՄ–ն Վրաստանին դուրս է թողել անվտանգ երկրների ցուցակից

Վրաստանն այլևս ընդգրկված չէ ԵՄ-ի ոչ անդամ՝ անվտանգ երկրների ցուցակում,  որոնց քաղաքացիները կարող են մեկնել Շենգենյան երկրներ. հաղորդում է «Ռուսթավի 2» հեռուստաընկերությունը:

Անվտանգ երկրների նոր ցուցակում ներառվելու է ինը երկիր՝ Ավստրալիա, Չինաստան, Նոր Զելանդիա, Ռուանդա, Սինգապուր, Թաիլանդ, Ուրուգվայ, Հարավային Կորեա և Ճապոնիա:

ԵՄ 27 անդամ պետությունների վերջնական որոշումը կհրապարակվի հոկտեմբերի 23-ին:

Մարտին կորոնավիրուսային համաճարակի պատճառով եվրոպական երկրները փակել էին իրենց սահմանները ԵՄ ոչ անդամ երկրների համար: Հուլիսի 1-ին ԵՄ-ն սկսեց մասամբ բացել իր սահմանները:

Ցուցակը կվերանայվի և, ըստ անհրաժեշտության, կթարմացվի երկու շաբաթը մեկ:

Վրաստանում համաճարակաբանական իրավիճակը կտրուկ սկսել է վատթարանալ սեպտեմբերի սկզբից, երկրում արագ աճում է կորոնավիրուսով վարակվածների թիվը:

Համաձայն վերջին տվյալների՝ համաճարակի սկզբից մինչև հոկտեմբերի 21-ը երկրում վարակված մարդկանց ընդհանուր թիվը 21 208 է: Համաճարակի սկզբից մինչ օրս բուժվել է 9 003 հիվանդ: Մահացել 172-ը։ Վրաստանում վարակի առաջին դեպքը գրանցվել է փետրվարի 26-ին: