Մոսկվայի իշխանությունները տարեց մարդկանց խնդրել են տանը մնալ

Մոսկվայի քաղաքապետ Սերգեյ Սոբյանինը 65-ից բարձր տարիքի մարդկանց, ինչպես նաեւ քրոնիկական հիվանդություններ ունեցողներին խնդրել է սեպտեմբերի 28-ից տանը մնալ. հայտնում է Meduza-ն:

Նշվում է, որ նման մարդիկ չպետք է առանց հատուկ անհրաժեշտության դուրս գան տնից: Նրանք պետք է հնարավորինս քիչ գնան խանութներ եւ դեղատներ, դիմակ ու ձեռնոցներ կրեն: Առաջարկվում է նաեւ ժամանակավորապես հրաժարվել հարազատների ու ընկերների հետ շփումից, որոնք առանձին են ապրում: Բացօթյա զբոսանքներն ու մարզումները չեն սահմանափակվում:

65-ից բարձր տարիքի աշխատող և քրոնիկական հիվանդություններ ունեցող մարդկանց խորհուրդ է տրվում անցնել հեռավար աշխատանքի կամ արձակուրդ վերցնել:

Միևնույն ժամանակ, Սոբյանինը դիմել է նաեւ գործատուներին` խնդրելով նրանց հնարավորինս շատ աշխատողների տեղափոխել հեռավար աշխատանքի: Նա խորհուրդ է տվել խստորեն պահպանել սանիտարահամաճարակային անվտանգության միջոցներն աշխատավայրերում:

Հիշեցնենք՝ սեպտեմբերի 24-ին Մոսկվայում հունիսից ի վեր առաջին անգամ COVID-19-ով վարակման ավելի քան հազար նոր դեպք էր գրանցվել: