ՏԵՍԱՆՅՈՒԹ․ Ալիևի հայտարարությունների հետևում հստակ երևում են տանկերն ու թնդանոթները․ Արմեն Աշոտյան

Ոչ թե Ադրբեջանն է Ղարաբաղ ուզում, այլ Ադրբեջանն ու Թուրքիան ուզում են Հայաստանն ու Ղարաբաղը. ըստ Yerkir.am-ի՝ հայտարարեց ՀՀԿ փոխնախագահ Արմեն Աշոտյանը մամուլի ասուլիսում։

Նրա դիտանկյունից՝ Արցախի շուրջ տեղի ունեցող գործընթացները շատ մտահոգիչ են, իսկ ՀՀ արտաքին գործերի նախարարի երեկվա պահվածքը՝ զարհուրելի:

«Ադրբեջանի նախագահ Իլհամ Ալիեւի հայտարարություններն ունեն հստակ քաղաքական նպատակ, դրանք ընդհանուր քաղաքականության մի մաս են: Դրան գումարեք թուրքական կողմի հայտարարությունները և կհասկանանք, որ ոչ թե Ադրբեջանն է Ղարաբաղ ուզում, այլ Ադրբեջանն ու Թուրքիան ուզում են Հայաստանն ու Ղարաբաղը: Պանթուրքիստական շրջանակների ախորժակը շատ ավելին է այլևս, քան պարզապես Արցախը: Այս պարագայում լսել Նիկոլ Փաշինյանի չստացված դասախոսությունները, երբ նա պետք է դրա փոխարեն հակադարձեր Ալիևին, լսել ԱԳ նախարարի խոսքը, որ չի մեկնաբանում Ալիևի ելույթը, քանի որ այն հուզական էր, պարզապես զավեշտալի է»,- ասաց Արմեն Աշոտյանը։

Ադրբեջանի նախագահ Իլհամ Ալիեւի հայտարարությունը, թե բանակցությունները տապալված են հայկական կողմի մեղքով, ևս մտահոգել է ՀՀԿ փոխնախագահին։

«Ալիեւի հայտարարությունների հետևում հստակ երեւում են տանկերն ու թնդանոթները: Եթե պատերազմ լինի, Հայաստանը չպետք է պիտակավորվի որպես մեղավոր այդ պատերազմում: Տարակուսել կարելի է, թե ինչ խայտառակ աներեսությամբ է ՀՀ գործող վերնախավը՝ վարչապետ-արտգործնախարար զույգով, վերաբերվում այն խայտառակ ձախողումներին, որոնք արձանագրվել են արցախյան ուղղությամբ այս իշխանության օրոք»,- ասաց նա։

Արմեն Աշոտյանի համոզմամբ՝ բանակցային գործընթացը տանուլ տված իշխանությունն այսօր տանուլ է տալիս նաև քարոզչությունը:

«Ալիեւը բաց տեքստով խոստովանեց, որ Դուշանբեում Նիկոլ Փաշինյանն իրեն խնդրել է չկրակել, որ նախկինները չվերադառնան: Այն, որ մենք ասում էինք՝ Նիկոլ Փաշինյանն իր ներքին իշխանությունն ամրացնելու համար պատրաստ է ոտնատակ տալ ազգային-պետական օրակարգը, իրականություն է»,- ասաց նա:

Մանրամասն՝ տեսանյութում: