Սահակաշվիլին համաձայնել է Վրաստանի վարչապետ դառնալ, եթե հաղթի ընդդիմությունը

Վրաստանի նախկին նախագահ, Ուկրաինայի բարեփոխումների ազգային խորհրդի գործադիր կոմիտեի ղեկավար Միխեիլ Սահակաշվիլին հայտարարել է, որ ինքը համաձայն է զբաղեցնել Վրաստանի վարչապետի պաշտոնը «կայունացման ժամանակահատվածում», եթե ընդդիմությունը հաղթի հոկտեմբերի 31-ին կայանալիք խորհրդարանական ընտրություններում: Պաշտոնյան այս մասին հայտնել է իր ֆեյսբուքյան էջում:

Նա, մասնավորապես, նշել է. «Ես տվել եմ իմ համաձայնությունը վրացական միավորված ընդդիմության առաջարկին՝ զբաղեցնել երկրի վարչապետի պաշտոնը հոկտեմբերի 31-ին կայանալիք խորհրդարանական ընտրություններում հաղթանակից հետո»:

Սահակաշվիլին հավելել է, որ համաձայնել է անցումային վարչապետ լինել ոչ թե ամբողջ ժամկետով, այլ «կայունացման ժամանակահատվածում»՝ «մինչև մենք կկարողանանք հաղթահարել խոր տնտեսական ճգնաժամը, որում ներկայումս գտնվում է Վրաստանը»:

Միևնույն ժամանակ, քաղաքական գործիչը շեշտել է, որ ինքն այս պահին կատարում է Ուկրաինայի Բարեփոխումների ազգային խորհրդի գործադիր կոմիտեի ղեկավարի գործառույթները:. «Ինձ համար Ուկրաինայի և Վրաստանի ճակատագրերն անբաժան են: Ես չեմ ընտրում երկու երկրների միջև, իմ պայքարը շարունակվում է և՛ այստեղ, և՛ այնտեղ»,- հստակեցրել է նա:

Հիշեցնենք՝ երեկ՝ սեպտեմբերի 7-ին, վրացական ընդդիմադիր «Ուժը միասնության մեջ է» միավորումը նախկին նախագահ Սահակաշվիլիին ներկայացրել է որպես վարչապետի թեկնածու: