Լույս է տեսել ՀՅԴ պաշտոնաթերթ «Դրօշակ»-ի իններորդ համարը

Սեպտեմբերի 1-ից համացանցի վրա է ՀՅԴ Բյուրոյի պաշտոնաթերթ «Դրօշակ»-ի իններորդ համարը: Ընթերցողը կնկատի, որ պաշտոնաթերթի սեպտեմբերյան համարի առանցքում երկու կարեւորագույն իրադարձություններ են՝ Հայաստանի եւ Արցախի անկախության տարեդարձերը: Հայկական երկու պետությունների անկախացման իրողության, անցած ճանապարհի եւ առկա մարտահրավերների շուրջ է «Դրօշակ»ի հարցազրույցը ՀՅԴ Բյուրոյի նախագահ Արմեն Ռուստամյանի հետ: Անկախության ժամանակահատվածում դրսեւորված եւ այսօր էլ մտահոգության տեղիք տվող ազգային կարեւորագույն հիմնահարցերի է անդրադառնում նաեւ պաշտոնաթերթի առաջնորդողը:

Արցախյան թեման սրանով չի սպառվում. պատմաբան Արմեն Ասրյանի «Ղարաբաղի խնդիրը 1918-1920 թթ: Անգլիայի դիրքորոշումը եւ մեր դասերը» ուսումնասիրությունը անդրադարձ է մեր պատմության ծանր, դրամատիկ եւ իրադարձություններով հագեցած այն ժամանակահատվածին, երբ, չնայած արցախահայության հերոսական ճիգերին, գերտերությունների հովանավորությամբ Արցախին պարտադրվեց ադրբեջանական գերությունը:

«Դրօշակ»ի ուշադրությունից չի վրիպել անցած օգոստոսին Լիբանանին պատուհասած ծանր աղետի թեման: Տեղի ունեցածը քաղաքական ակնոցով քննում է «Ազդակ» օրաթերթի միջազգային լուրերի խմբագիր Վահրամ Էմմիյանը:

«Դրօշակ»ը անդրադարձել է հայության մարմնի մեկ այլ հատվածի եւս՝ սիրիահայությանը կամ, ավելի ստույգ, Քեսաբին ու քեսաբահայության առօրյային, որն իր վրա դեռ կրում է երեկվա ապրած ծանր փորձության կնիքը:

Այսքանով չի ավարտվում նոր լույս տեսած պաշտոնաթերթի հրապարակումների ցանկը, ընթեցողը նրանում կգտնի հետաքրքրության արժանի մի շարք այլ հոդվածներ:

Ներբեռնել համարը «Դրօշակ»-թիվ-9 2020