ՄԱԿ-ի ԱԽ-ն մերժել է Իրանի դեմ պատժամիջոցները վերականգնելու ԱՄՆ-ի հայցը

ՄԱԿ-ի Անվտանգության խորհուրդը չի կարող բավարարել ԱՄՆ-ի հայցը Իրանի նկատմամբ պատժամիջոցների սահմանափակումների վերականգնման վերաբերյալ. այս մասին օգոստոսի 25-ին հայտարարել է ՄԱԿ-ի Անվտանգության խորհրդում նախագահող Ինդոնեզիայի ներկայացուցիչ Դիան Տրիանշանհ Ջանին:

Ըստ նրա՝ այս որոշման պատճառն այս հարցում կոնսենսուսի բացակայությունն է.

«Ես նամակներ եմ ստացել անդամ բազմաթիվ երկրներից: Ինձ համար շատ պարզ է, որ կա մի երկիր, որն ունի որոշակի դիրք, մինչդեռ զգալի թվով այլ երկրներ հակառակ կարծիքն ունեն»:

Ջանին բացատրել է, որ ՄԱԿ-ի Անվտանգության խորհուրդը չի կարող հետագա գործողություններ ձեռնարկել Միացյալ Նահանգների խնդրանքով՝ հակաիրանական պատժամիջոցների վերաբերյալ:

Հատկանշական է, որ Բրիտանիան, Ֆրանսիան, Գերմանիան և Բելգիան նույնպես դեմ են արտահայտվել հակաիրանական պատժամիջոցների վերականգնման ԱՄՆ-ի հայցի ընդունմանը:

Նշենք, որ 2015 թվականից Իրանի դեմ գործող զենքի էմբարգոն, որը սահմանել էր ՄԱԿ-ը՝ ԱՄՆ նախաձեռնությամբ, ավարտվում է այս տարվա հոկտեմբերն։ ԱՄՆ-ն ցանկանում է երկարաձգել էմբարգոն, սակայն, հաշվի առնելով, որ այլևս չի հանդիսանում Համատեղ գործողությունների համապարփակ ծրագրի անդամ,  իրավունք չունի Իրանի դեմ նման պատժամիջոցների մասին նախագիծ ներկայացնել։ Օրեր առաջ ՄԱԿ-ի ԱԽ-ում ԱՄՆ նախաձեռնությունը ևս մերժվել էր. Չինաստանն ու Ռուսաստանը դեմ էին արտահայտվել, իսկ եվրոպական տերությունները չէին աջակցել ԱՄՆ-ին՝ մնալով ձեռնպահ։