Իրանում նշել են, որ ԱՄՆ-ի կողմից առգրավված բենզինը Վենեսուելային է պատկանում

ԱՄՆ-ի կողմից առգրավված լցանավերը պատկանում էին ոչ թե Իրանին, այլ Վենեսուելային: Այս մասին երեքշաբթի հայտարարել է Իրանի նավթի նախարար Բիժան Նամդար Զանգանեն:

«Բեռը ներառում էր բենզին, որը Իրանը վաճառել էր Վենեսուելային: ԱՄՆ-ը բռնագրավել է Վենեսուելայի, ոչ թե Իրանի ունեցվածքը», - մեջբերում է IRIB-ը:

Օգոստոսի 13-ին The Wall Street Journal-ը հաղորդել է, որ ԱՄՆ իշխանությունները առգրավել են լցանավեր, որոնք նախատեսված էին Իրանից Վենեսուելա վառելիք փոխադրելու համար: Պարբերականի տեղեկություններով՝ նավերը հսկողության տակ են վերցվել առանց ռազմական ուժի կիրառման և ուղևորվել են Հյուսթոնի (Տեխաս) նավահանգիստ:

Հաջորդ օրը Կարակասում Իրանի դեսպան Խոջաթ Սոլթանին հերքեց թերթի տեղեկությունները՝ հայտարարելով, որ տանկերի սեփականատերը և դրոշները ոչ մի կապ չունեն Թեհրանի հետ: