Վերանայե՛լ Բաքվին ռազմամթերք վաճառելու գործընթացը. Ֆրանսիացի հայազգի պատգամավորը դիմում է երկրի ԱԳՆ-ին

Ֆրանսայի Ազգային Ժողովի՝ Հայ Յեղափոխական Դաշնակցության կողմից առաջադրված հայազգի պատգամավոր  Դանիել Ղազարյանը պաշտոնական հարցադրում-պահանջով դիմել է արտաքին գործոց նախարար Ժան-Իվ Լը Տրիանին` Հայաստանի դեմ Ադրբեջանի վերջին ոտնձգությունների առնչությամբ: 

Դանիէլ Ղազարյանը, դատապարտելով Հայաստանի հյուսիս-արեւելյան սահմանի վրա կատարված ադրբեջանական նախահարձակ քայլը, որն արժանացել է հայկական բանակի հաղթական պատասխանին, պահանջում է պաշտոնական Փարիզի դիվանագիտական կտրուկ միջամտությունը: Պատգամավորը պահանջում է նաև հստակ դատապարտել ադրբեջանական կողմին, ինչպես նաեւ վերանայել Բաքվին ռազմական տեխնիկա վաճառելու գործընթացը: 

Լիոնի երրորդ ընտրատարածքից ընտրված պատգամավորը հստակ նշել է նաեւ Իլհամ Ալիեւի անդադար կրկնվող ռազմատենչ հայտարարություններն ու սպառնալիքները, որոնք, ըստ իրեն, վայելում են Անկարայի եւ Էրդողանի անմիջական զորակցությունը: Պատգամավորը եզրակացրել է, որ այս ընթացքը վտանգ է ներկայացնում ոչ միայն Հայաստանի, այլեւ ամբողջ տարածաշրջանի համար: