Ինչու՞ է Google քարտեզներում բացակայում Պաղեստինը

«Google» ընկերությունը պարզաբանել է Պաղեստինի բացակայությունը իր քարտեզներից, նշելով, որ այն կապված է վիճելի տարածքները օբյեկտիվորեն ցուցադրելու ձգտումով. այս մասին գրում է ՌԻԱ «Նովոստի»-ն:

Ընկերությունում, մասնավորապես, նշել են. «Մենք չեզոքություն ենք պահպանում աշխարհաքաղաքական վեճերի առնչությամբ և ջանքեր գործադրում վիճելի տարածքները մեր քարտեզներում օբյեկտիվորեն ցուցադրելու համար՝ սահմանագծերը նշելով գորշ կետագծերով», ու հավելել՝ իրենք օգտագործում են քարտեզագրական կազմակերպությունների և աղբյուրների տեղեկությունները՝ վիճելի տարածքների հարցում որոշում կայացնելու համար:

Հիշեցնենք՝ ավելի վաղ որոշ օգտատերեր նկատել էին՝ ընկերության քարտեզում Պաղեստինը պատկերված է որպես Իսրայելի և մյուս հարևան պետությունների տարածք:

Միևնույն ժամանակ, Պաղեստինը նշված է այլ ինտերնետ-ռեսուրսների քարտեզներում, օրինակ՝ Yandex.Maps-ում: