Մի նախարարացու է՞լ չունեք. Ինչու Փաշինյանը չի կողմնորոշվում. «Իրատես»

«Իրատես» թերթը գրում է. «Արդեն երկու ամսից ավելի է շրջակա միջավայրի նախարարությունը նախարար չունի։ Ինչու՞ է Նիկոլ Փաշինյանն անտեր թողել այս նախարարությունը։ Վերջերս խորհրդարանում ԱԺ-կառավարություն հարցուպատասխանի ժամանակ Նիկոլ Փաշինյանը մի բացառիկ պարզաբանում արեց։ Պատգամավորի դիտարկմանը, թե ոլորտում բազմաթիվ խնդիրներ կան, բայց համակարգողը՝ նախարարը, չկա, նա ասաց. «Ձեր նշած բոլոր հարցերի համար պատասխանատու է ՀՀ կառավարությունը. կարող եմ ասել, որ նախարարությունը գործում է բնականոն, կա նախարարի պարտականությունները կատարող»։

Այսինքն, եթե կառավարությունն է պատասխանատու, բոլոր նախարարներին էլ ազատեք, տեղակալները բնականոն աշխատանքը կապահովեն, կառավարությունն էլ բոլորի համար պատասխանատու կլինի։ Իրականում բավական հետաքրքիր հարց է ծագում` ինչու՞ Փաշինյանը չի կարողանում կողմնորոշվել բնապահպանության ոլորտի աշխատանքները համակարգողի հարցում, որի ենթակայության տակ են նաև հանքերը։

Այս նախարարության «գաղտնիքն» այն է, որ նրա համակարգման տիրույթում է ամենախնդրահարույց հարցերից մեկը՝ Ամուլսարի շահագործման խնդիրը։ Մեր աղբյուրը չբացառեց, որ այս ձգձգումը պայմանավորված է նաև այն հանգամանքով, որ կա՛մ Փաշինյանը իր որոշմանը համապատասխան կադր չի գտել, կա՛մ «անգլուխ» նախարարությամբ ավելի հեշտ է ուզածին հասնել»:

Առավել մանրամասն՝ թերթի այսօրվա համարում