Ինտերպոլը չի քննի Թրամփի նկատմամբ միջազգային հետախուզում հայտարարելու Իրանի իշխանությունների հայցը

Ինտերպոլը չի քննի գեներալ Ղասեմ Սուլեյմանիի սպանությւան համար Թրամփի նկատմամբ միջազգային հետախուզում հայտարարելու Իրանի իշխանությունների հնարավոր հայցը, քանի որ այն հակասում է կազմակերպության ներքին կանոններին, հայտնում է ՏԱՍՍ-ը՝ վկայակոչելով Լիոնում գտնվող միջազգային ոստիկանական կազմակերպության մամուլի ծառայությանը։

«Ինտերպոլի սահմանադրության 3-րդ հոդվածի համաձայն, «կազմակերպությանը խստիվ արգելվում է քաղաքական, ռազմական, կրոնական կամ ռասայական բնույթի ցանկացած միջամտություն կամ գործողություն կատարել»,- ասել են Ինտերպոլում: Այդ պատճառով, եթե նման հայցեր ներկայացվեն, մեր սահմանադրության դրույթների եւ Ինտերպոլի կանոնների համաձայն, նմանատիպ հարցումները չեն դիտարկվի»,- ընդգծել են կազմակերպությունում:

Երկուշաբթի օրը, ավելի վաղ, Թեհրանի դատախազ Ալի Մեհրը հայտարարել էր, որ Իրանի դատական իշխանությունները Ինտերպոլից պահանջում են, որ Թրամփի հանդեպ միջազգային հետախուզում հայտարարվի՝ գեներալ Սուլեյմանիի սպանության համար: «Հայտնաբերվել են ԱՄՆ-ի 36 ներկայացուցիչներ, այդ թվում՝ Դոնալդ Թրամփը, ինչպես նաեւ այլ երկրների ներկայացուցիչներ, որոնք մասնակցել են Ղասեմ Սուլեյմանիի սպանությանը»,- մեջբերում է նրան IRNA-ն: Դատախազը հավելել է, որ դատական մարմինները «հրահանգել են [այդ մարդկանց] պատասխանատվության ենթարկելու եւ Ինտերպոլի միջոցով կարմիր կարգավիճակ հայտարարելու մասին»: Նրա խոսքերով՝ «հիշատակված մարդիկ մեղադրվում են սպանության եւ ահաբեկչական գործունեության մեջ»:

Հունվարի լույս 3-ի գիշերը Բաղդադի օդանավակայանի մերձակայքում ԱՄՆ-ի հրթիռային հարվածի հետեւանքով սպանվել էր Իսլամական հեղափոխության պահապանների կորպուսի հատուկ նշանակության ջոկատի հրամանատար Ղասեմ Սուլեյմանին: Ի պատասխան՝ հունվարի լույս 8-ի գիշերը Թեհրանը հրթիռային գրոհ էր իրականացրել Իրաքում երկու օբյեկտների՝ Այն էլ Ասադի բազայի եւ Էրբիլ քաղաքի օդանավակայանի վրա, որոնք օգտագործել էին ԱՄՆ զինված ուժերը։