2016-ին կերազեինք, որ այդ նույն զենքից ունենայինք. Արցախի օդն այսօր ամբողջությամբ պաշտպանված է. Արայիկ Հարությունյան

Արցախի Հանրապետության նախագահ Արայիկ Հարությունյանը վստահեցնում է, որ այսօր Արցախի օդն ամբողջությամբ պաշտպանված է։ Արայիկ Հարությունյանն այս մասին ասել է Հանրային հեռուստաընկերության «Հարցազրույց» հաղորդաշարին տված հարցազրույցում։

Արցախի նախագահն ընդգծել է, որ պատահական չէ, որ 2019 թվականը բանակի սպառազինության առումով համարել է շրջադարձային, և այն էլ մի քանի ուղղությամբ` և ռազմական տեխնիկայի ձեռքբերման, զինվորների ու սպաների սոցիալ-կենցաղային պայմանների բարելավման, և նյութական աշխատավարձերի բարձրացման ուղղությամբ: «Ես չեմ ուզում անդրադառնալ այն մարդկանց, որոնք փորձում են ամեն ինչ սևացնել կամ քննադատել, այդ թվում ձեռք բերված զենքի հետ կապված` անվանելով հին, հնամաշ, չաշխատող: 2016 թվականին մենք կերազեինք, որ այդ նույն զենքից ունենայինք»,- ասել է Հարությունյանը:

Հարցին, դա կփոխե՞ր զոհերի թիվը, Հարությունյանը պատասխանել է․

«Գիտեք, ոչ։ Խոսքը եթե գնում է հակաօդայինի մասին, ապա օդային հարձակում տեղի չի ունեցել, բայց մենք շատ ավելի անպաշտպան էինք, շատ ավելի անպաշտպան: Չեմ ուզում փակագծեր բացել. Ստեփանակերտն անպաշտպան էր, Ստեփանակերտի օդը անպաշտպան էր 2016 թվականին: Ուզում եմ վստահ հայտարարել, որ այսօր ոչ միայն Ստեփանակերտի, այլ նաև ողջ Արցախի օդն է պաշտպանված: Եվ այդ նույն հակաօդային պաշտպանության բնագավառում մեծ տեղ է հատկացվել իրենց նշած այդ հին, չաշխատող սարքավորումներին, որոնք արդեն իսկ իրենց դերը խաղացել են. Բացի դրանից նոր հակաօդային միջոցներ են ձեռք բերվել, ու այսօր օգտագործում ենք Արցախի օդը պաշտպանելու առումով: Գիտեք` ամենախոցելին մեզ համար օդն էր, և այդ վտանգը կար 1992-1994 թվականներին` հազիվ էինք պաշտպանվում: Առաջնագիծը շատ ավելի անգամներով այսօր ավելի անվտանգ է, քան երբևէ ունեցել ենք»,- ասել է Հարությունյանը:

Անդրադառնալով կենցաղային պայմանների բարելավմանը՝ Արցախի նախագահն ընդգծել է, որ տասնամյակներ շարունակ երազել են առաջնագծում հոսող ջուր, խմելու ջուր ունենալ։ «Այսօր դա ապահովված է: Եթե ասում են նախկինում սնունդը լավն էր, նախկինում լավը չէր, ընդամենը այդ բառը կարող եմ ասել ու բավարարվել: Այսօր զինվորը լիիրավ սնվում է»,-նշել է Հարությունյանը:

Նա անդրադարձել է նաև բանակի սպաների աշխատավարձերի բարձրացմանը, սոցիալական մյուս երաշխիքներին: «ՀՀ վարչապետի հետ միասին ծրագիր ենք սկսել, և բանակի սպայական անձնակազմի բնակարանային խնդիրը լուծվելու է: Արցախում ավելի քան հազար ընտանիք սպասում է բնակարանային խնդրի լուծմանը: Մարդիկ կան որոնք սպասում են տասնամյակներ, արդեն գումարը հատկացված է, և 2023թ-ին խնդիրը լուծված կլինի: Ընդհանուր առմամբ երկու կառավարությունների գլխավոր խնդիրն է լինելու բանակաշինություն, սպառազինություն, կենցաղային պայմաններ, դրամական աջակցություն և մնացածը»,- ընդգծել է Արայիկ Հարությունյանը: