Ֆրանսիայի ռազմածովային ուժերի դեմ Թուրքիայի ագրեսիան սպառնում է ՆԱՏՕ-ի միասնականությանը. Հունաստանի ՊՆ

ՆԱՏՕ-ի միասնականության պահպանման համար անհրաժեշտ պայմանը դաշնակիցների լիարժեք համապատասխանությունն է միջազգային իրավունքին, բարիդրացիության սկզբունքը և ՆԱՏՕ-ի հիմնադիր պայմանագրից բխող պարտավորությունները. այս մասին հայտարարել է Հունաստանի Ազգային պաշտպանության նախարար Նիկոլաոս Պանայոտոպուլոսը ՆԱՏՕ-ի պաշտպանության նախարարների հետ վիդեոկոնֆերանսի միջոցով հանդիպման ժամանակ ունեցած իր ելույթում. հայտնում է greekcitytimes.com կայքը։

Պանագիոտոպուլոսը «քննադատել է Միջերկրական ծովում դաշնակից նավի կողմից ուժի գործադրման սպառնալիքն ընդդեմ մեկ այլ դաշնակից նավի»:

Նա նշել է, որ նման պահվածքը խաթարում է ՆԱՏՕ-ի համախմբվածությունն ու համերաշխությունը՝ այն դարձնելով ոչ թե դաշինք ամուր կապերով և ընդհանուր արժեքներով, օպորտունիստական խումբ՝ անհատական շահերով։

Ազգային պաշտպանության նախարարը նշել է, որ միակ լուծումը ՄԱԿ-ի հովանու ներքո քաղաքական խորհրդակցություններն ու բանակցություններն են պատերազմող կողմերի միջև՝ Բեռլինի գործընթացով սահմանված բանաձևերի հիման վրա:

Չորեքշաբթի օրը Ֆրանսիայի արտգործնախարարության խոսնակ Ագնես ֆոն դեր Մալը հայտարարել է, որ Թուրքիայի գործողությունները «թշնամական և ագրեսիվ են», հավելելով, որ Անկարան է այն պատճառը, որ Հյուսիսային Աֆրիկայում խաղաղություն ու կայունություն չի հաջողվել պահել:

Հիշեցնենք, որ օրեր առաջ խիստ լարված իրավիճակ էր ստեղծվել Միջերկրական ծովում։ ՆԱՏՕ-ի առաքելության շրջանակներում ծովում գտնվող ֆրանսիական նավի անձնակազմը փորձել էր ստուգել՝ արդյոք թուրքական նավը զենք չի տեղափոխում Լիբիա (Լիբիա զենք տեղափոխելը արգելվել է հակամարտության լուծման շրջանակներում Բեռլինում ձեռք բերված պայմանավորվածություններով), ինչի ի պատասխան թուրքական նավերը հրթիռներ ուղղեցին դեպի ֆրանսիական լավը՝ հասնելով ռազմական բախման շեմին։