Իրանը դեռևս չի ստանձնել պատասխանատվություն Թեհրանում ինքնաթիռի կործանման համար․ Ուկրաինայի ԱԳՆ

Չնայած իրանական հրթիռով ՄՈւԱ ավիաընկերության ուղեւորատար ինքնաթիռը խոցելուն՝ Թեհրանը դեռևս չի ստանձնել պատասխանատվություն աղետի համար. այս մասին հայտարարություն է տարածել Ուկրաինայի արտգործնախարարությունը, նշելով՝ Իրանն ապացուցում է, որ ինքնաթիռի կործանումը տեղի է ունեցել մարդկային սխալի հետեւանքով. այս մասին գրում է ՌԲԿ-Ուկրաինա-ն՝ Ուկրաինայի ԱԳ փոխնախարար Եվգենի Ենինի խոսքերին հղումով։ 

Ըստ ԱԳ փոխնախարարի՝ Ուկրաինան պնդում է, որ աղետի պատճառների մասին խոսել կարելի է միայն հետաքննության ավարտից հետո։

«Մենք այն կարծիքին ենք, որ պատճառների մասին պետք է խոսել միայն այն ժամանակ, երբ ամբողջությամբ կավարտվի ինչպես տեխնիկական, այնպես էլ քրեական հետաքննությունը, եւ կպարզվեն այդ ողբերգության բոլոր հանգամանքները»,- հայտարարել է Ենինը։

Ավելի վաղ հայտնել էինք, որ ՄՈւԱ ուկրաինական ավիաընկերության ինքնաթիռը կործանվել է հունվարի 8-ի առավոտյան Թեհրանի օդանավակայանից թռիչք կատարելուց րոպեներ անց։ Ուղեւորատար ինքնաթիռը խոցվել էր իրանցի զինվորականների արձակած հրթիռի միջոցով։ Ողբերգության հետեւանքով զոհվել էր 176 մարդ։