SkyNews-ը ներողություն է խնդրել իր թղթակցի՝ ինքնաթիռի կործանման վայրում ռեպորտաժի համար

Բրիտանական SkyNews հեռուստաալիքը ներողություն է խնդրել այն բանից հետո, երբ նրա թղթակից Քոլին Բրեյզերը ուղիղ եթերում սկսել է ուսումնասիրել Դոնեցկի մոտակայքում կործանված մալայզիական ինքնաթիռի ուղեւորներից մեկի անձնական իրերը. տեղեկացնում է РИА Новости-ն:

«Մեր թղթակից Քոլին Բրեյզերը ռեպորտաժ էր վարում ինքնաթիռի կործանման վայրից եւ հեռուստադիտողներին ցուցադրել է ուղեւորներից մեկի ճամպրուկի պարունակությունը: Քոլինն անմիջապես գիտակցել է, որ սխալ է վարվում եւ ասել այդ մասին եթերում: Ե՛վ Քոլինը, ե՛ւ SkyNews-ը ներողություն են հայցում»,- ասվում է հեռուստաալիքի տարածած հայտարարության մեջ:

SkyNews-ի կադրերը բողոքի մեծ ալիք են բարձրացրել հեռուստադիտողների շրջանում, սոցցանցերում: Իսկ ԶԼՄ-ների բնագավառի փորձագետ Ջո Ուոթսոնը կատարվածը որակել է որպես «սարսափելի պահ ժուռնալիստիկայի համար»: