ԱՄՆ-ն Վենեսուելա նավթ ներկրող կազմակերպությունների նկատմամբ պատժամիջոցներ է սահմանել

ԱՄՆ ֆինանսների նախարարությունը պատժամիջոցներ է կիրառել չորս ընկերությունների նկատմամբ, որոնք, ըստ Վաշինգտոնի, անմշակ նավթ էին մատակարարում Վենեսուելային:

«Միացյալ Նահանգները կշարունակի հետապնդել նրանց, ովքեր աջակցում են այս կոռումպացված ռեժիմին և նպաստում են վենեսուելական ժողովրդի շարունակական տառապանքներին», - նշել է ֆինանսների նախարար Ստիվեն Մնուչինը:

Երեք ընկերություններ, որոնց դեմ Վաշինգտոնը պատժամիջոցներ է սահմանել, գրանցված են Մարշալյան կղզիներում, ևս մեկը՝ Հունաստանում: Պատժամիջոցների են ենթարկվել նաև այդ ընկերությունների կողմից օգտագործված չորս նավթային լցանավեր:

Փետրվարին հաղորդվել էր, որ ԱՄՆ-ն ընդգրկել է «Ռոսնեֆտի» շվեյցարական առևտրային կառույցին՝ Rosneft Trading S.A.-ին պատժամիջոցների ցանկում՝ Վենեսուելայում գործողությունների համար:

Վենեսուելայում իրավիճակը սրվել է 2019 թվականի հունվարի 23-ից հետո, երբ տեղի ընդդիմության առաջնորդ Խուան Գուաիդոն, որի խորհրդարանի խոսնակի պաշտոնում նշանակումը երկու օր առաջ չեղյալ էր հայտարարվել Գերագույն դատարանի կողմից, իրեն հայտարարեց գործող նախագահ: Մոտ 60 երկիր, ներառյալ ԱՄՆ-ը, նրան ճանաչեցին որպես պետության ժամանակավոր ղեկավար:

Այս իրադարձություններից հետո Վաշինգտոնը պատժամիջոցներ սահմանեց Վենեսուելայի նավթային հատվածի նկատմամբ և արգելեց ամերիկյան նավթային ընկերություններին գործել երկրում։