Նոր Զելանդիան պատժամիջոցներ է սահմանել 14 ռուսաստանցիների և ռուսական 7 կազմակերպությունների դեմ

Նոր Զելանդիան նոր պատժամիջոցներ է սահմանել ռուսաստանցի 14 ֆիզիկական եւ յոթ իրավական անձանց դեմ Ուկրաինայի շուրջ իրադրության կապակցությամբ: Այդ մասին հայտարարել է երկրի ԱԳՆ-ի ղեկավար Նանայա Մահուտան:

Նրա խոսքով՝ պատժամիջոցների ներքո են հայտնվել առավելապես զինծառայողներ, պաշտպանական կառույցներ ու դրանց ղեկավարներ, ռազմականացված կազմակերպություն, ինչպես նաեւ ապատեղեկատվություն տարածողներ: Մասնավորապես, պատժամիջոցների ցուցակում են հայտնվել այն ընկերությունների ղեկավարներն ու բաժնետերերը, որոնք մշակում եւ արտադրում են հրթիռներ եւ հրաձգային զենք:

Դրանից առաջ Նոր Զելանդիան հակառուսական պատժամիջոցներն ընդլայնել էր սեպտեմբերի կեսերին: Այն ժամանակ պատժամիջոցների ցուցակում ընդգրկվել էին 51 թոփ-մենեջերներ եւ գործարարներ, 24 պաշտոնյաներ, որոնք կապված են Ռուսաստանին նոր տարածքներ միացնելու հետ, եւ երկու ընկերություններ, հաղորդել է «Ինտերֆաքս»-ը: