ԱՄՆ-ը մեղադրել է Ռուսաստանին Լիբիա ավիացիա փոխադրելու մեջ

ԱՄՆ զինված ուժերի աֆրիկյան հրամանատարությունը Twitter-ի իր էջում գրառմամբ մեղադրել է Ռուսաստանին՝ ռազմական ինքնաթիռները Լիբիա տեղափոխելու մեջ. այս մասին գրում է BBC-ն։

Մամլո հաղորդագրության մեջ, մասնավորապես, նշվում է՝ Մոսկվան տեխնիկա է ուղարկել «Վագներ» մասնավոր ռազմական ընկերությանը աջակցելու համար: Ընկերության վարձկանները, ըստ Պենտագոնի, պայքարում են Լիբիայի ազգային բանակի կողմից, որը ղեկավարում է Խալիֆա Հաֆթարը:

Աֆրիկյան հրամանատարությունում հայտնել են նաև, ռազմական օդանավերը ժամանել են Սիրիայի տարածքով, որտեղ դրանք ներկվել են՝ պատկանելությունը թաքցնելու նպատակով։

Պետդումայի պաշտպանական հանձնաժողովի նախագահ Անդրեյ Կրասովը հայտարարություն է տարածել այս առնչությամբ, նշելով՝ ռուսական ռազմական ինքնաթիռները Լիբիա տեղափոխելու վերաբերյալ ամերիկյան հաղորդագրություններն իրականությանը չեն համապատասխանում:

Միևնույն ժամանակ պատգամավորը հիշեցրել է՝ Ռուսաստանը հանդես է գալիս Լիբիայում բռնություններին վերջ տալու օգտին և հակամարտության կողմերին կոչ է անում բանակցել: