Վրաստանում հույս ունեն, որ Ուկրաինան շուտով կտեսնի Սահակաշվիլիի իրական դեմքը

Վրաստանի խորհրդարանի պաշտպանության և անվտանգության հարցերով հանձնաժողովի ղեկավար Իրակլի Սեսիաշվիլին հայտարարել է, որ Թբիլիսին  ցանկանում էր ուկրաինացի գործընկերներին ներկայացնել ճշմարտությունը, երբ համոզում էր նրանց Վրաստանի նախկին նախագահ Միխեիլ Սահակաշվիլիին չնշանակել  ղեկավար պաշտոնի Ուկրաինայում. տեղեկացնում է yerkir.am-ը` EADaily-ին հղումով:

Նրա խոսքով` վրացի պատգամավորները մտահոգված էին Սահակաշվիլիի նշանակման հեռանկարից և ցանկանում էին պաշտպանել Կիևին նրանից:

«Հուսով եմ, որ ուկրաինացիները շատ շուտով կտեսնեն Սահակաշվիլիի իրական դեմքը»,- ասել է Սեսիաշվիլին:

Ուկրաինայի նախագահ Վլադիմիր Զելենսկին անցյալ շաբաթ Միխեիլ Սահակաշվիլիին նշանակել է Բարեփոխումների ազգային հանձնաժողովի գործադիր ղեկավար: Դրանից առաջ նրան պատրաստվում էին նշանակել բարեփոխումների հարցով փոխվարչապետի պաշտոնում, սակայն Գերագույն ռադան հավանություն չտվեց այդ որոշմանը:

Ի պատասխան Սահակաշվիլիի նշանակմանը, Վրաստանը Կիևից հետ կանչեց իր դեսպանին, սակայն խոսքը դիվանագիտական հարաբերությունները խզելու մասին չէ, դեսպանը հետ է կանչվել «խորհրդակցությունների համար»:

Զելենսկին Վրաստանի այդ քայլը որակել է որպես  սխալ և նշել է, որ Կիևը պատասխան սխալը չի անելու:

Վրաստանում Սահակաշվիլիի նկատմամբ հայտարարված է հետախուզում, նրա դեմ  4 քրեական գործ է հարուցված: