Ոտնահարվում է խոսքի, մտքի եւ ազատ կամքի իրավունքը. «Մեդիա պաշտպան»-ը «5-րդ ալիքի» շուրջ տեղի ունեցող իրադարձությունների մասին

Այլակարծությունը եւ իշխանության քննադատությունը դատապարտվում է, ոտնահարվում է խոսքի, մտքի եւ ազատ կամքի իրավունքը։ Նման դրսեւորումներով հասարակությունը չի նպաստում ազատ հասարակության ձեւավորմանը եւ դեմ է գնում լրագրողական աշխատանքին։ Այս մասին հայտարարություն է տարածել «Մեդիա պաշտպան» նախաձեռնությունը։

Հայտարարության մեջ, մասնավորապես, ասվում է.

«Լայնածավալ արշավ՝ հեռուստաընկերության դեմ

«Մեդիա պաշտպան» նախաձեռնությունը, հետեւելով համացանցում 5-րդ ալիքի շուրջ տեղի ունեցող իրադարձություններին, անհանգստություն է հայտնում։ Որոշ օգտատերեր պահանջում են, որ հեռուստաընկերությունը դադարեցնի գործունեությունը: Ըստ մշտադիտարկման արդյունքների` հասարաքաղաքական ներկայացուցիչները պնդում են, որ հեռուստաընկերության դեմ արշավը վերահսկվում է իշխանությունների կողմից։

«Մեդիա պաշտպան» նախաձեռությունն անընդունելի է համարում ատելության խոսքի նման դրսեւորումը։ Փաստացի, այլակարծությունը եւ իշխանության քննադատությունը դատապարտվում է, ոտնահարվում է խոսքի, մտքի եւ ազատ կամքի իրավունքը։ Նման դրսեւորումներով հասարակությունը չի նպաստում ազատ հասարակության ձեւավորմանը եւ դեմ է գնում լրագրողական աշխատանքին։

Լրատվականներն ազատ են իրենց կամարտահայտման հարցում, եւ լրագրողի աշխատանքը կարող է իր մեջ քննադատություններ պարունակել իշխանության հասցեին, բայց դա հիմք չէ, որպեսզի լայնածավալ արշավ սկսվի հեռուստաընկերության դեմ։

Ի դեպ, այսօր Մարդու իրավունքների պաշտպան Արման Թաթոյանը մտահոգություն է հայտնել ատելութայն խոսքի առնչությամբ: Նա անդրադարձել է նաեւ լրագրողներին թիրախավորելուն` նշելով. «Հաճախ լրագրողներին նույնացնում են այն անձի հետ, որից նա կարող է հարցազրույց վերցնել, եւ թիրախավորել լրագրողին։ Լրագրողի աշխատանքի հետ կապված կան որոշակի կարծրատիպեր, թե լրագրողը խոչնդոտում է որեւէ մարմնի աշխատանքը: Դա կարծրատիպ է ընդամենը, պետք է լրագրողի հետ ճիշտ աշխատելու սկզբունք որդեգրել, ելնել այն կանխավարկածից, որ լրագրողն օգնում է աշխատանքին»։

Փաստացի, մարդու իրավունքների պաշտպանն էլ է իր մտահոգությունը հայտնում ստեղծված իրավիճակով եւ խոսքի ազատության դեմ իրականացվող արշավով»: