Թուրքիայի Այդըն նահանգում հայտնաբերվել են 18-­րդ դարի հայկական տապանաքարեր

Թուրքիայի Այդըն նահանգի Նազիլլի քաղաքում զբոսայգու կառուցման աշխատանքների ժամանակ ապրիլի 22-ին հայտնաբերվել են 18-­րդ դարի երկու արձանագիր տապանաքարեր: Այս մասին Ֆեյսբուքյան իր էջում գրել է Հայկական ճարտարապետությունն ուսումնասիրող հիմնադրամի գիտաշխատող Րաֆֆի Քորթոշյանը։ 

«Մշակութային եղեռնը շարունակվում է. յուրացված հայոց գերեզմանոցի տեղում, թուրքական ոստիկանական դպրոց, ապա քաղաքային այգի:

Թուրքիայի Նազիլլի քաղաքի (Այդըն նահանգում) նախկին ոստիկանական դպրոցի տարածքում իրականացված, քաղաքային այգու կառուցման աշխատանքների ժամանակ, 2020 թ. ապրիլի 22-ին, հայտնաբերվել է ԺԸ դարի երկու արձանագիր տապանաքար: Տապանաքարերում հիշվում է Հայաստանի Տաշտուն և Կարպի գյուղերը:

<> թերթի լրագրող Մեհմեդ Ալի Ջինթոսունի հրապարակած լուսանկարներից հնարավոր է ընթերցել հետևյալ արձանագրությունները.

1. Այս է տապան տաշտունեցի տր. Մօվսէսի որդի Յօսէփին, թվ. ՌՃՀԷ (1728 թ.):

2. Այս է տապան կարպէցի տր. Մարտիրոսի կողակից Էպրաքին որ փոխեցաւ առ Ած., թվն. ՌՄԺԷ (1768 թ.), փէդրվարի Զ (6)-ին: Այս հինկ երէխաս ըս դուրան»,- գրել է Քորթոշյանը: