«Խթանելու եմ հայրենադարձությունը, հզորացնելու եմ բանակը». Հայկ Սարգսյանի առաջիկա ծրագրերը

Վարչապետի տիկին Աննա Հակոբյանի հետ անցյալում ունեցած «բախման» և առաջիկա ծրագրերի մասին զրուցեցինք  ՀՀ ԱԺ պատգամավոր  Հայկ Սարգսյանի հետ։

-Պարոն Սարգսյան, անցած շրջանում մամուլում շրջանառվեց վարչապետի տիկին Աննա Հակոբյանի կողմից Ձեզ ուղղված «Դու ըն­դա­մենը Նի­կո­լի շի­շը բռ­նողն ես եղել» արտահայտությունը։ Ինչպե՞ս կմեկնաբանեք  այս ամենը:

-Անհեթեթ սուտ է, տվյալ  հորինված հոդվածով փորձել են վնասել  իմ պատիվն  ու  արժանապատվությունը, ինչի  համար  դիմել եմ դատարան:

-Իսկ ինչպիսի՞ ընթացք է ունեցել գործը`դատարան դիմելուց հետո:

-Դատարանի վճիռ դեռ չկա, գործը ընթացքի մեջ է: Մի քանի ամիս կտևի դատական գործընթացը:

- Հայտարարել եք, որ իրականացնում եք բարեգործական ծրագրեր, որո՞նք են եղել դրանք՝ 2018  թվականից  ի վեր:

-Բարեգործական մեծ ծրագրեր իրականացնելու միջոցներ չունեմ, սակայն իմ ընկերների հետ որոշ ծրագրեր ենք իրականացրել, մարզի 1000 երեխաների համար Սևանի ափին գեղեցիկ  միջոցառում ենք կազմակերպել, ինչպես  նաև  27 դիրքերի  համար  քաղցրավենիք  և այլ անհրաժեշտ պարագաներ ենք ուղարկել Ամանորին:

-Որպես ԱԺ պատգամավոր, ինչպե՞ս եք գնահատում ՀՀ վարչապետ Նիկոլ Փաշինյանի գործունեությունը և ունեք, արդյո՞ք, ինչ-որ  ծրագրեր կապված մարզերում ապրող  բնակչության հետ, որը պետք է իրագործվի Ձեր և Նիկոլ Փաշինյանի համագործակցությամբ (խնդրում եմ բերեք օրինակներ):

-Այս տարի իմ մեծ նպատակներից մեկը  Սևանի  թերակզուց  սկսվող  ճեմուղու  կառուցման  աշխատանքները սկսելն է:

-Ունեք ներդրումային ծրագրեր Վարդենիս համայնքում: Եվ, եթե չկա, ապա հնարավո՞ր է, որ լինեն:

-Կոնկրետ առանձին համայնքների հետ կապված ծրագրեր չկան, ընդհանրական ծրագրեր են, որոնք  վերաբերվում են բոլորին։

-Ի՞նչ եք խոստանում հասարակությանը հետագայում, ինչպիսի ծրագրեր ունեք ապագայում:

-Ունեմ օրենսդրական նախաձեռնություններ, որոնցով  պատրաստվում եմ խթանել հայրենադարձությունը, սահմանամերձ բնակավայրերում  ակտիվացնել բիզնեսը, հզորացնել բանակը։

Զրուցեց՝ Զարուհի Խլոյանը