ԱՀԿ ղեկավարը հորդորել է «չքաղաքականացնել» կորոնավիրուսը. BBC

Առողջապահության համաշխարհային կազմակերպության ղեկավար Թեդրոս Ադհան Գեբրեյեսուսը, մեկնաբանելով ԱՄՆ նախագահ Դոնալդ Թրամփի՝ ԱՀԿ բյուջե ուղղվող ֆինանսական աջակցության դադարեցման մասին մտադրությունը, հանդես է եկել հայտարարությամբ՝ ի պաշտպանություն ԱՀԿ-ի աշխատանքի միևնույն ժամանակ հորդորելով վերջ դնել Covid-19 կորոնավիրուսային հիվանդության քաղաքականացմանը. հայտնում է Yerkir.am-ը՝ BBC-ին հղումով։

Նշվում է՝ Գեբրեյեսուսը հերքել է Թրամփի՝ Չինաստանի ուղղությամբ կենտրոնանալու վերաբերյալ մեղադրանքներն ու պարզաբանել, որ ԱՀԿ-ում ազգերի և ժողովուրդների միջև տարբերակում չեն դնում։

«Ազգային միասնականության կոչ եմ անում և խնդրում եմ Covid-19-ը չշահարկել քաղաքական տեսակետների արտահայտման նպատակով։ Երկրորդ՝ համերաշխության կոչ եմ անում համաշխարհային մակարդակով», - պարզաբանել է ԱՀԿ ղեկավարը՝  իր խոսքում անտեսելով ԱՄՆ նախագահ Դոնալդ Թրամփի ֆինանսական սպառնալիքը՝ հայտնելով, որ, ինքն այն կարծիքին է, ԱՄՆ-ի ֆինանսավորումը կշարունակվի:

Հիշեցնենք՝ ավելի վաղ ԱՄՆ նախագահ Դոնալդ Թրամփը քննադատել էր Առողջապահության համաշխարհային կազմակերպությանը. ԱՄՆ նախագահի տեսակետով՝ այն ֆինանսավորվում է հիմնականում ԱՄՆ միջոցների հաշվին, բայց կենտրոնացած է Չինաստանի վրա: