Լոֆթ կենտրոնին «մխրճում են» Լոռու մարզային գրադարանի մեջ

Օրերս Վանաձորում բուռն քննարկվում է Լոռու մարզային գրադարանում Լոֆթ կենտրոն տեղակայելու նախագիծը։ 

Սկսած 2017 թվականից այս նախագիծը քննարկվում էր, բայց  մերժվեց, քանի որ նախագիծը էապես կխոչնդոտեր գրադարանի գործունեությանը, գումարած դրան, գործարքի պայմանները հավասարակշռված չէին: 

Յուրաքանչյուր ընթերցասեր վանաձորցի կփաստի, որ Լոռու մարզային գրադարանը ամենաակտիվ պետական գրադարաններից է և բազմաթիվ ընթերցողներ ունի, թե երիտասարդների և թե մեծահասակների շրջանում։ Լոֆթին տարածք տրամադրելը առնվազն կիսով չափ կրճատում է գրադարանի տարածքը․ գրադարանը կզրկվի  ընթերցասրահից և դահլիճից, ուր պարբերաբար կայանում են տարբեր հանդիպումներ և գրական միջոցառումներ։

Քանի որ գրադարանն ունի  տարեց ընթերցողներ՝ ևս բնական է, որ սույն փոփոխությունը բացասաբար կազդի առաջին հերթին նրանց այցելության վրա։

Ծրագիրը բուռն քննարկում է գտել նաև տնօրինության և աշխատակիցների կողմից, որոնք ևս կարծում են, որ նախագիծը  կխոչնդոտի գրադարանի բուն գործունեությանը։ Հետաքրքրական է նաև այն փաստը, որ պետական հաստատության տարածքի մոտ 250 քմ առանց մրցույթի հատկացնում են շահույթ հետապնդող կազմակերպության։ 

Մարզային գրադարանի անձնակազմը և Վանաձորի մտավորականությունը հույսով սպասում են ԿԳՄՍ նախարարության հստակ և արդարացի որոշմանը։

Նյութը ` Հրաչուհի Լոռեցյանի