ԱՄՆ փոխնախագահ Փենսը նշանակվել է կորոնավիրուսի դեմ պայքարի պատասխանատու

ԱՄՆ նախագահ Դոնալդ Թրամփը երկրի փոխնախագահ Մայք Փենսին նշանակել է նոր տեսակի կորոնավիրուսի տարածման դեմ պայքարի պատասխանատու. հայտնում է Yerkir.am-ը՝ BBC-ին հղումով:

Նշվում է՝ ԱՄՆ նախագահը և փոխնախագահը տեղեկացրել են՝ ԱՄՆ-ի համար վիրուսի ռիսկը ցածր է մնում:

Լրագրողների հետ զրույցի ընթացքում Թրամփը վստահություն է հայտնել, որ ԱՄՆ-ն կարող է դիմակայել կորոնավիրուսին: Թրամփի պնդմամբ՝ մասնագետներն աշխատում են պատվաստանյութ մշակելու ուղղությամբ: Միևնույն ժամանակ ԱՄՆ նախագահը նշել է, որ երկիրը պետք է պատրաստ լինի, եթե վիրուսը տարածվի:

Հավելվում է նաև, որ ԱՄՆ առողջապահության նախարար Ալեքս Ազարը պարզաբանել է, որ Սպիտակ տունը կենտրոնանում է հինգ առաջնահերթությունների վրա, ինչպիսիք են՝ հիվանդությունների ավելի լավ վերահսկողության, տեղական իշխանությունների արձագանքի համակարգման, բուժման մեթոդների մշակման, անձնական առողջության պահպանման համար նախատեսված միջոցների, մասնավորապես՝ պաշտպանիչ դիմակների արտադրության ավելացման:

Նշենք՝ ԱՄՆ-ում այս պահի դրությամբ 60 կորոնավիրուսակիր կա: