ԱՄՆ Սենատը հավանություն է տվել կորոնավիրուսի դեմ պայքարի ֆինանսավորման նախագծին

ԱՄՆ Սենատը հավանություն է տվել կորոնավիրուսի տարածման դեմ պայքարի նպատակով 8.3 միլիարդ դոլարի հատկացման նախագծին. հայտնում է Yerkir.am-ը՝ CNN-ին հղումով:

Լրատվամիջոցւ տվյալներով՝ համապատասխան օրինագծով նախատեսվում է հատկացնել 7.8 միլիարդ դոլար կորոնավիրուսի դեմ պայքարի նպատակով, ինչպես նաև հեռահար բժշկությանը՝ մինչև 500 միլիոն դոլարի լրացուցիչ ծախսեր:

7.8 միլիարդ դոլարից 3 միլիարդ դոլարը նախատեսվում է ծախսել պատվաստանյութերի, արագ թեստերի ու բուժական միջոցների հետազոտման և մշակման վրա:

1.25 միլիարդ դոլար կհատկացվի՝ կանխելու վիրուսի տարածումը Միացյալ Նահանգների սահմաններից դուրս: Շուջ 1 միլիարդ դոլար կհատկացվի դեղորայքի ձեռքբերմանը:

Հավելվում է նաև, որ Կոնգրեսի կողմից հաստատված օրինագիծը կուղարկվի Սպիտակ տուն՝ նախագահ Դոնալդ Թրամփը ստորագրությամբ հաստատվելու նպատակով:

Ավելի վաղ տեղեկացրել էինք՝ ԱՄՆ Կոնգրեսի ստորին պալատը հաստատել է կորոնավիրուսի ֆինանսավորումը:

Yerkir.am-ն ավելի վաղ տեղեկացրել էր, որ չինական Ուհան քաղաքում բռնկված ու ողջ աշխարհում տարածում գտնող անհայտ տիպի կորոնավիրուսով վարակվածների թիվն օր օրի աճում է։ Կորոնավիրուսի բռնկման մասին չինական իշխանությունները ԱՀԿ-ին տեղյակ էին պահել  դեռևս դեկտեմբերին:

Մարտի 6-ի ժամը 10.23-ի դրությամբ ողջ աշխարհում հաստատվել է կորոնավիրուսով վարակման 98.385 դեպք, որից 3383-ը՝ մահվան, և 55.423-ը՝ առողջացման:

ԱՄՆ-ում այս պահին կա հաստատված 233 կորոնավիրուսակիր, որից 12-ը մահվան, իսկ 8-ը առողջացման դեպքեր են: