ԱՄՆ-ը դատապարտել է ՌԴ-ի կողմից Վրաստանի դեմ իրականացրած կիբերհարձակումը

Վրաստանի արտգործնախարարությունը երեկ՝ փետրվարի 20-ին, հայտարարություն է տարածել առ այն, որ 2019 թվականի հոկտեմբերին Վրաստանում կիբերհարձակում է իրականացվել Ռուսաստանի զինված ուժերի գլխավոր շտաբի կողմից. հայտնում է Yerkir.am-ը՝ The Washington Post-ին հղումով:

Նշվում է՝ կիբերհարձակման հետևանքով խնդիրներ էին առաջացել հարյուրավոր կայքերի, այդ թվում ՝ Վրաստանի Առաջին ալիքի կայքում: Ժամանակավորապես խափանվել էր Վրաստանի ռադիոյի աշխատանքը:Կիբերհարձակումն իրականացվել էր նաև Վրաստանի նախագահի աշխատակազմի կայքի վրա: Կայքերը բացելու ընթացքում հայտնվում էր նախկին նախագահ Միխեիլ Սաակաշվիլիի լուսանկարը՝ «Ես կվերադառնամ» տիտրերով:

«Ամերիկայի Միացյալ Նահանգները դատապարտում է Ռուսաստանի կողմից Վրաստանի դեմ իրականացրած կիբերհարձակումը»,- ընդգծել է ԱՄՆ-ի պետքարտուղար Մայք Պոմպեոն ու նշել, որ Նահանգները կոչ է անում Ռուսաստանին դադարեցնել նման գործողությունները Վրաստանում և այլ երկրներում:

Գերատեսչության կողմից տարածված հայտարարությունում միևնույն ժամանակ ասված է. «Կիբերտարածքի կայունությունը կախված է պետությունների պատասխանատու պահվածքից: Մենք կշարունակենք աշխատել միջազգային հանրության հետ։ Միաժամանակ մենք նաև խոստանում ենք Վրաստանին և նրա ժողովրդին, որ կաջակցենք կիբերանվտանգության ամրապնդմանը և կօգնենք դրա դեմ պայքարում: Մենք Վրաստանին կառաջարկենք լրացուցիչ հմտությունների զարգացում և տեխնիկական աջակցություն ՝ նման գործողություններից պաշտպանվելու նպատակով»:

Ի պատասխան՝  Վրաստանի ԱԳ նախարար Դավիթ Զալկալիանին շնորհակալություն է հայտնել ԱՄՆ-ին և Մեծ Բրիտանիային՝ 2019-ի հոկտեմբերին Վրաստանում գրանցված լայնածավալ կիբերհարձակման հարցում ցուցաբերած աջակցության համար:

Ավելի վաղ Yerkir.am-ը հայտնել էր՝ Վրաստանը մեղադրել էր ՌԴ-ին հաքերային հարձակում իրականացնելու մեջ: