ԱԺ-ն ընդունեց «օրենքով գողերի» մասին օրենքի նախագիծը

ԱԺ-ն այսօր երկրորդ ընթերցմամբ ընդունեց երեկ ԱԺ դահլիճում վիճաբանությունների և քաշքշուկի պատճառ դարձած «Հայաստանի Հանրապետության քրեական օրենսգրքում փոփոխություններ և լրացումներ կատարելու մասին» և «Հայաստանի Հանրապետության քրեական դատավարության օրենսգրքում լրացում կատարելու մասին» օրենքների նախագծերի փաթեթը: Այն ընդունվեց 73 կողմ, 20 դեմ և 15 ձեռնպահ ձայներով: Լուսավոր Հայաստան խմբակցությունը հայտարարել էր, որ ձեռնպահ է քվեարկելու:

Նախագծով նախատեսվում է քրեական պատասխանատվություն սահմանել քրեական աստիճանակարգության բարձրագույն կարգավիճակ տալու կամ ստանալու կամ պահպանելու համար: Քրեական ենթամշակույթ կրող խմբավորում ստեղծելու կամ ղեկավարելու համար, քրեական ենթամշակույթ կրող խմբավորմանը մասնակցելու կամ ներգրավելու համար: Քրեական ենթամշակույթ կրող խմբավորման մասնակցին կամ քրեական աստիճանակարգության բարձրագույն կարգավիճակ ունեցող անձին դիմելու համար՝ վերջիններիս անօրինական ազդեցությունն օգտագործելու միջոցով նյութական կամ ոչ նյութական օգուտ կամ այլ առավելություն ստանալու համար: