Սևակին սպանողը պատժվեց, բայց Սևակին սպանած ատելության մթնոլորտը շարունակվում է. Գարո Փայլան

Քրդական Ժողովուրդների դեմոկրատական կուսակցության հայ պատգամավոր Գարո Փայլանը անդրադարձել է երեկ թուրքական դատարանի կողմից պոլսահայ Սևակ Բալըքչըի սպանության համար մարդասպան Քըվանչ Աղաօղլուին 16 տարի 8 ամիս ազատազրկման դատավճռին:

«Սևակ Բալըքչըն Հայոց ցեղասպանության 96-րդ տարելիցին՝ 2011 թ. ապրիլի 24-ին ատելությամբ սպանվել է զինվորական ծառայության ընթացքում: 9 տարի տևած արդարության պայքարի արդյունքում, մարդասպանը դատապարտվեց 16 տարի 8 ամիս ազատազրկման: Սևակին սպանողը ստացավ իր պատիժը, բայց Սևակին սպանած ատելության մթնոլորտը դեռ շարունակվում է», - ըստ Yerkir.am-ի՝ իր թվիթերյան էջում գրել է Փայլանը:

Թուրքական Bianet.org-ին տված հարցազրույցի ընթացքում Փայլանը նշել է, որ վերջապես երկրում ականատես եղանք, որ հայերի դեմ ատելությամբ կատարված հանցանքը դատարանի կողմից պատժի արժանացավ:

«Այդ մեղադրայլի կողմից հայի սպանության մթնոլորտը դեռ պետք է հետաքննվի, սակայն դեռ չենք առերեսվել նման բանի: Հույս ունեմ, որ այս որոշումը կթեթևացնի Սևակի ընտանիքին և նրան սիրողների սրտերը» , - նշել է Փայլանը և հույս հայտնել, որ նման որոշում կկայացվի նաև Հրանտ Դինքի սպանության գործում: