Հայոց ցեղասպանության մասին Էրդողանի խոսքերն Թուրքիայում «ամոթալի» են համարել

Թուրք քաղաքագետ Ջեյլան Օզգյուլը հարցազրույց է տվել ռուսական «360» հեռուստաալիքին, որում նա ամոթալի է համարել Էրդողանի այն տեսակետը, թե պետք է հավասարության նշան դնել 1915  թվականի՝ Օսմանյան կայսրության ոճրագործության և ԱՄՆ-ի կողմից հնդկացիների ոչնչացման միջև. ըստ Yerkir.am-ի՝ հայտնում է Rusarminfo-ն:

Նա մանրամասնել է, որ ի տարբերություն Անկարայի,  որը խուսափում է ոճրագործության մասին քննարկումներից, Սպիտակ տունը հրապարակավ բարձրացրել է բնիկ ամերիկացիների ցեղասպանության հարցը, ներողություն է խնդրել, ինչպես նաև փոխհատուցել իր արարքների համար։

Բացի այդ, Օզգյուլի պնդմամբ, Ամերիկայում հնդկացիների խոշոր համայնքներ չեն մնացել, որոնք մշտապես կարող են բարձրաձայնել իրենց խնդրի մասին։

Քաղաքագետը հավելել է նաև, որ հայկական սփյուռքը անհամեմատ մեծ է։ Մասնավորապես, Հայաստանում ապրում է ավելի քան 3 միլիոն մարդ, և ամբողջ աշխարհում ցրված են հայ էթնիկ խմբի շուրջ 10 միլիոն ներկայացուցիչներ:

«Դրա համար սա Թուրքիայի պատմության մեջ նախագահի ամենաամոթալի արարքներից մեկն է»,- բացատրել է քաղաքագետը:

Yerkir.am-ն ավելի վաղ տեղեկացրել էր, որ ԱՄՆ Սենատը միաձայն ընդունեց Հայոց ցեղասպանությունը ճանաչող թիվ 150 բանաձևը, ինչը դուր չէր եկել Թուրքիայի նախագահ Ռեջեփ Էրդողանին։

Թուրք նախագահը սպառնացել էր ԱՄՆ-ն. այն մեծ աղմուկ բարձրացրեց Թուրքիայում։