30 մլն՝ իշխանությունների մեղքերի թողություն համար, իսկ զոհված զինծառայողների ընտանիքներին անտեսեցին. Մարգարիտա Խաչատրյան

Կառավարության շենքի առջև բողոքի ցույց են իրականացնում զոհված զինվորների մայրերը, որոնք բողոքում են կառավարության այն որոշման դեմ, ըստ որի՝ Մարտի 1-ի զոհերի հարազատների փոխհատուցում է տրվելու՝ 30 մլն դրամի չափով:

«Նրանք Օպերայից մինչև քաղաքապետարան պայքարում էին խանութները թալանելու, երկիրը աղավաղելու, աթոռակռվի համար: Իսկ հիմա իրենց մեղքերի թողությունը տալու համար նրանց (Մարտի 1-ի զոհերի հարազատներին) տվեցին 30 մլն, իսկ զոհված զինծառայողների ընտանիքին անտեսեցին, ասացին՝ գնացե՛ք: Առաջնահերթությունը պետք է տրվեր զոհվածի ընտանիքին: Մեզ տեսնող ծնողը ինչպե՞ս պետք է պայքարի հայրենիքի համար: Ի՞նչ սանդղակ եք կիրառում մեր նկատմամբ, հասանելի՞ չենք ձեզ համար: Այստեղ փողի խնդիրը չէ, այլ մեզ վիրավորելու»,- ըստ Yerkir.am-ի՝ հայտարարեց «Զինվորի մայր» ՀԿ-ի նախագահ Մարգարիտա Խաչատրյանը:

«Հարցը գումարի չափը չէ, այլ զոհված ընտանիքին արժևորելն է: Մենք բարձրացել էինք վարչապետի մոտ, մեզ էլի պատասխան չէին տվել: Ասաց, որ իր օգնականը պետք է զբաղվի, օգնականն էլ խաղում է ժամանակի վրա: Էս արհամարհանքի՞ն պետք է արժանանան զոհվածների ընտանիքները, ի՞նչ հեղափոխություն է բա, եթե նախկինները չեն արել, իրե՞նք էլ չեն անելու»,- շարունակեց նա: