40 հազարից ավելի զբոսաշրջիկ է Արցախ այցելել 10 ամսում

2019 թվականի հունվարից հոկտեմբեր ժամանակահատվածում Արցախի Հանրապետություն է այցելել 40 097 զբոսաշրջիկ` ըստ Yerkir.am-ի հայտնում է aparaj.am-ը:

Նրանցից 19 568-ը ժամանել են ԱՊՀ, 20529-ը` այլ երկրներից(ԱՄՆ, Իտալիա, Ֆրանսիա)` գերազանցելով նախորդ տարվա նույն ժամանակահատվածի ցուցանիշը (27089) 13008 -ով կամ 48% -ով:

Հյուրանոցային տնտեսության օբյեկտների թիվն աճել է 28-ով` կազմելով 91 օբյեկտ։ Վերջին տասը տարում ՀՏՕ-ների թիվն աճել է 5,3 անգամ՝ 17-ից հասնելով 91-ի:

ԱՀ-ում գործում է տասը զբոսաշրջային օպերատոր և մեկ զբոսաշրջային գործակալ:

2019 թվականի հունվար-հոկտեմբեր ամիսներին ‹‹Տիգրանակերտ›› պետական պատմամշակութային արգելոցն ունեցել է 14 ու կես հազար այցելու, որը զիջում է 2018 թվականի ցուցանիշին (16690) 13% -ով:

Հունվարից հոկտեմբեր ժամանակահատվածում 1 056 զբոսաշրջիկ դիմել է Ստեփանակերտի և Շուշիի զբոսաշրջային տեղեկատվական կենտրոններ:

Ազգային վիճակագրական ծառայության անցկացրած հետազոտության արդյունքում պարզվել է , որ զբոսաշրջիկների` Արցախ այցն ընտրելու տեղեկատվական աղբյուրները եղել են հարազատները (41.2%), նախկին այցելությունները (24.9 %), համացանցը (11.4%), իսկ Արցախն ընտրելու հիմնական պատճառները` գեղատեսիլ բնությունը (31.1%), պատմամշակութային արժեքները ( 29.6%), մասնագիտական այցերը ( 9.1%), այլ (22.7 %):