«Պանդոկ Երեւան» ռեստորանների ցանցը ներողություն է խնդրում Արարատ Միրզոյանից

«Պանդոկ Երեւան» ռեստորանների ցանցը ներողություն է խնդրում ԱԺ նախագահ Արարատ Միրզոյանից՝ արտահոսքի համար:

Այս առնչությամբ, այսօր՝ նոյեմբերի 25-ին, «Պանդոկ Երեւան» ռեստորանների ցանցն իր Facebook-ի էջում հայտարարություն է տարածել, որտեղ նշվում է.

«Հարգարժա՛ն պարոն Միրզոյան, «Պանդոկ Երեւան» ռեստորանների ցանցի տնօրինությունն ու աշխատակազմը հայցում է Ձեր ներողամտությունը ստեղծված իրավիճակի եւ նման անհարմարություն պատճառելու համար: Մեր ցանցը Երեւանում գործում է 2006 թվականից եւ վայելում է երեւանցիների եւ քաղաքի հյուրերի սերն ու վստահությունը: Մեր համար մեր աշխատանքում ամենակարեւորն ու առաջնայինը յուրաքանչյուր հաճախորդի հարմարավետությունն է:

Ստեղծված իրավիճակում մեր աշխատակիցը թույլ է տվել կոպտագույն սխալ՝ խախտել մասնագիտական էթիկայի սկզբունքները։ Մեր ընկերության ղեկավարությունն անթույլատրելի է համարում նման անտեղի շահարկումները եւ կրկին անգամ ներողություն խնդրում մեր աշխատակցի անթույլատրելի վարքագծի համար»:

Հիշեցնենք, որ նախօրեին ԱԺ նախագահ Արարատ Միրզոյանն իր ֆեյսբուքյան էջում գրել էր, թե ինչպես է իր ծննդյան օրը խաշկերույթ կազմակերպել եւ 290 հազար դրամի հաշիվ փակել։ Մինչ այդ համացանցում տեղեկություններ էին շրջանառվում ԱԺ նախագահի ծննդյան օրվա խնջույքի մասին։

Նա, մասնավորապես, նշել էր.

«Սիրելիներս, տարեդարձիս առիթով երեկ առավոտյան հարազատներիս հրավիրել էի խաշի։ Հավաքույթի ավարտին վճարեցի 290 հազար դրամի կարգի գումար։

Քիչ առաջ տեսա իմ և այս միջոցառման մասին մի զզվելի գրառում, որում առկա ստի, վիրավորանքների և զրպարտության համար դատական հայց եմ ներկայացնելու հեղինակի դեմ։

Գրառման հեղինակը ոչ թե սխալ տեղեկություններ ունեցող մի քաղաքացի է, այլ էժանագին խաբեությամբ և մանիպուլիացիայով մեր քաղաքական թիմին վարկաբեկելու համար ջանք չխնայող մեկը՝ կարծեմ ինչ֊որ ՀԿ ղեկավար, "Անտիֆեյք" կայքի հիմնադիր ու քաղաքական առաջնորդության հայտ ներկայացնող մեկը։

Գրառման մեջ կասկած է հայտնվում, թե ինչպես ես այդ հաշիվը կարող էի վճարել՝ ապրելով միայն աշխատավարձով։ Դե ինչ, եթե դա է հույսներդ՝ մեզ կապել ինչ֊որ կոռուպցիոն ապօրինի եկամուտների հետ, ապա ձեր գործն ավելի անհույս է և դուք ավելի անճար, քան ինձ թվում էր։

Նաև պնդում է արվում, թե ես այդպիսի բան ինձ նախկինում չէի կարող թույլ տալ, ու անգամ իմ ապառիկները չէի կարողանում փակել։ Ասեմ, որ մինչև ԱԺ պատգամավոր ընտրվելը ես շատ բարձր վարձատրվող աշխատանքներ եմ ունեցել։ Ասենք՝ այժմյան աշխատավարձիս շուրջ կրկնակին։ Իսկ ապառիկի վերաբերյալ կատակս կարող եք գտնել ԱԺ համապատասխան նիստի տեսագրությունում՝ ասում եմ, որ ես մոռացել էի վճարել ՃՈ տուգանքը, ինչի համար էլ հաշիվներս սառեցվել էին։ Այս թեման այլ լույսի ներքո ներկայացնողներն ուղղակի էժանագին և անպատիվ խաբեություն են անում։

Ավելորդ եմ համարում ասել, որ սույն օգտատերը ստիպված պիտի լինի ապացուցել նաև իմ պլանքյաշ լինելը։

Ինչ վերաբերում է ռեստորանների ցանցին, որի անունը դեռ չեմ նշում, կարծում եմ այդ ընկերությունը պետք է հրապարակավ ներողություն խնդրի հաճախորդի տվյալների հրապարակման համար և հանուն իր իսկ բարի համբավի պարզի իր ներսում այդ հրապարակման աղբյուրը։

Հ.Գ. Քննարկման առարկա գրառումը՝ առաջին երկու մեկնաբանության մեջ։

Հ.Հ.Գ. Սա իհարկե չփչացրեց այն ջերմ զգացումը, որն ունեցա ձեր շնորհավորանքներից, բարեմաղթանքներից, ոգևորող և միաժամանակ պարտավորեցնող խոսքերից։ Անչափ շնորհակալ եմ»,- գրել  է նա:

Նշենք, որ Նարեկ Սամսոնյանն իր ֆեյսբուքյան էջում գրել էր.

«Ուրեմն Միրզոյան Արարատը ոչ միայն էնքան չկա, որ խաշ պատիվ տա իրա մոտիկներին ու պատրաստ լինի գլուխը բարձր ասի` «արել եմ լավ եմ արել էս էլ ծախսածիս սկզբնաղբյուրը», այլև էնքան ցածր ա, որ էդ ռեստորանի տնօրինության հետ ընկած ման ա գալիս թե ով ա իրա հաշվի մասին ինձ բան ասել: Խառնել են մատուցողներ, մենեջերներ և այլ մարդիկ: Էս դիլետանտները էն կարգի դիլետանտ են, որ անգամ ռեստորանի անունը ծակեցին իրանց հիմար պահվածքով: Ռեստորանի անունն էլ չեմ գրում զուտ ինձ զանգած ու վախեցած հարցեր տվող մարդու խաթր, բայց էդ մարդուն խնդրել եմ էդ ռեստորանի տնօրինությանը փոխանցի իմ ասածներն ու հեռախոսիս համարը: Նենց չանեք, որ սկսեմ ձեր ներքին խոհանոցը ժամանակից շուտ հետաքննական նյութ սարքեմ ու ասեմ հենց դուք ձեր սեփականատերերով իշխանափոխությունից հետո լիքը հարցերի եք պատասխանելու:
Էս չե՞ք արա!!!»: