Մենք հավատում էինք նրանց, և մեր սպասելիքներն արդարացան. Գերասիմ Վարդանյանը ողջունում է ԵՊՀ ՈՒԽ-ին՝ շարժմանը միանալու համար

Երբ օրեր առաջ այս շարժումը սկսվեց, տարբեր հայտարարություններ, տարբեր քննադատություններ, տարբեր թիրախավորումներ էին արվում ուսանողների հասցեին: Այսօր այդ թիրախները նույնն են, բայց բառապաշարն իջեցվել է փողոցային մակարդակի: Մենք պատրաստ չենք այդ մակարդակում, այդ լեքսիկոնով հարաբերվել. Yerkir.am-ի հաղորդմամբ՝ այսօր ԿԳՄՍ նախարարի հրաժարականը պահանջող՝ արդեն օրեր շարունակվող ցույցի ժամանակ հայտարարեց ՀՅԴ անդամ Գերասիմ Վարդանյանը:

Նա նշեց, որ ուսանողների շարքերում տեսնում է մարդկանց, որոնք օրեր շարունակ իրենց հետ են եղել՝ հավատալով, որ շատ շուտով իրենց թիվն ավելանալու է:   

Գերասիմ Վարդանյանը շնորհակալություն հայտնեց ԵՊՀ ուսանողական խորհրդին՝ շարժմանը միանալու համար: «Մենք հավատում էինք նրանց, և մեր սպասելիքներն արդարացան»,- ընդգծեց նա՝ շեշտելով, որ իրենց նպատակն ազգային առաջադեմ կրթություն ունենալն է, և իրենք հասնելու են այդ նպատակին:

Հիշեցնենք՝ արդեն մեկ շաբաթ է, ինչ տեղի է ունենում համաուսանողական բողոքի ակցիա: Ուսանողները հայտարարել են, որ պահանջում են ԿԳՄՍ նախարար Արայիկ Հարությունյանի հրաժարականը, քանի որ նա անհամատեղելի է զբաղեցրած պաշտոնի հետ: