Ոստիկանությունում ծառայողական քննություն է կատարվում ԵՊՀ ՈւԽ նախագահին բերման ենթարկելու կապակցությամբ

ՀՀ ոստիկանության պետի պաշտոնակատար, ոստիկանության գնդապետ Արման Սարգսյանի հանձնարարությամբ ոստիկանության ներքին անվտանգության վարչությունում ծառայողական քննություն է կատարվում երեկ՝ դեկտեմբերի 24-ին, Երևանի պետական համալսարանի ուսանողական խորհրդի նախագահ Դավիթ Ափոյանին Երևանի պետական համալսարանից ոստիկանության  Նորք-Մարաշ բաժանմունք բերման ենթարկելու կապակցությամբ:

Այս մասին GPnews.am-ի հետ զրույցում ասաց ՀՀ ոստիկանության հասարակայնության հետ կապի եւ լրատվության վարչության պետի տեղակալ Էդգար Ջանոյանը:

Ծառայողական քննության արդյունքում ստուգվելու է ոստիկանության ծառայողների գործողությունների իրավաչափությունը:

Հիշեցնենք, որ երեկ՝ դեկտեմբերի 24-ին, Երևանի պետական համալսարանից ոստիկանները բերման էին ենթարկել ԵՊՀ ուսանողական խորհրդի նախագահ Դավիթ Ափոյանին: