Ինձ համար տարօրինակ է, թե ինչու այս ֆակուլտետի դեկանն այսօր այստեղ չէ. ԵՊՀ ՈՒԽ նախագահ

Արայիկ Հարությունյանի դիրքորոշումներից, որոնք կրթությանն են վերաբերում, շատ դժգոհ եմ, որովհետև կրթությունն ամենաթողության է մատնված, չեմ կարծում, թե մայր բուհը կառավարության մեծ ուշադրության կենտրոնում է. այսօր ԵՊՀ հայ բանասիրության ֆակուլտետում լրագրողների հետ զրույցում, ըստ  Yerkir.am-ի, ասաց ԵՊՀ ՈՒԽ նախագահ Դավիթ Ափոյանը՝ հավելելով, որ նախարարությունը ուշադրություն չի դարձնում ԵՊՀ-ի ներքին կարգուկանոնին։

Ափոյանի պնդմամբ՝ կրթությունն այլևս առաջընթաց չի գրանցում:  «Կրթությունը, եթե ոչ՝ մեծ տեմպերով հետընթաց, ապա, լավագույն գնահատականով, նույն տեմպերով դոփում է տեղում»,- ասաց նա՝ միևնույն ժամանակ նշելով, որ այսօր հենց կրթության նախարարի հովանավորչությամբ շատ ավելի մեծ են կուլիսային խոսակցությունները ու դրանց վերջը պետք է դրվի:

Ինր վերաբերում է շրջանառվող լուրերին, թե ԵՊՀ ռեկտորի պաշտոնակատարը հանդիպում է ունեցել դեկանների հետ, Ափոյանն արձագանքեց.
«Ինձ համար տարօրինակ է, թե ինչու այս ֆակուլտետի դեկանն այսօր այստեղ չէ. որովհետև, ինձ հասած տեղեկությունների համաձայն, դեկանը ռեկտորի հետ ինչ-որ քննարկումների մեջ է: Ես չեմ ուզում մեղադրել ռեկտորին, դեկանին, սա ուղղակի ինչ-որ կազմակերպված քայլ է»:

Yerkir.am-ն ավելի վաղ տեղեկացրել էր, որ այսօր` նոյեմբերի 6-ին, ժամը 09:30-ից սկսած, ԵՊՀ հայ բանասիրության ֆակուլտետի (վայրը՝ Աբովյան 52 ա, ԵՊՀ 8-րդ մասնաշենք) ուսանողները դասադուլ են հայտարարելու, որով հանդես են գալու ԿԳՄՍ նախարարության կողմից շրջանառության մեջ դրված «Բարձրագույն կրթության մասին» օրենքի նախագծում «Հայոց լեզու», «Հայոց պատմություն» և «Հայ գրականություն» առարկաների դասավանդումը ոչ մասնագիտական բուհական ծրագերում ոչ պարտադիր դարձնելու մասին դրույթի դեմ: