Քիչ էր մնում՝ մտածեի, թե պարոն Սանասարյանը Ալ Կապոնեին հովանավորելու համար էլ ինձ կարող է մեղադրել. Արսեն Թորոսյան

Այսօր ԱԺ-ում լրագրողների հետ ճեպազրույցում առողջապահության նախարար Արսեն Թորոսյանն անդրադարձավ նաև  լիազորությունները ժամանակավորապես դադարեցված՝ ՊՎԾ  պետ Դավիթ Սանասարյանի կողմից իրեն հասցեագրված մեղադրանքներից մի քանիսին. տեղեկացնում է Yerkir.am-ը:

Լրագրողի հարցին՝  ինչո՞ւ կամ ի՞նչ  հիմքերով է Սանասարյանը մեղադրում Ձեզ և ձեր ընտանիքին կոռուպցիոն սկանդալների մեջ, Արսեն Թորոսյանը  պատասխանեց՝  ծիծաղով է  վերաբերվում այդպիսի մեղադրանքներին:

«Բազմիցս արձագանքել եմ՝ իմ ընտանիքը որևէ բժշկական հաստատություն չունի, իսկ պետպատվերի շրջանակներում գումարների տրամադրման ընթացակարգը հայտնի է բոլորին:  Երբ ես լսում էի այդ ամենը,  քիչ էր մնում մտածեի, թե Ալ Կապոնեին հովանավորելու համար էլ ինձ կարող է մեղադրել պարոն Սանասարյանը: Ես Դավիթ Սանասարյանին  արդեն մի հանրային խորհուրդ տվել եմ, բայց ոնց որ թե նա չի պատրաստվում հետևել այդ խորհրդին: Ես Դավիթ Սանասարյանի հետ անձնավորված որևէ խնդիր չունեմ, մենք չենք շփվում իրար հետ»,- ասաց Արսեն Թորոսյանը: