Առաջարկ՝ ԱՄՆ զորքերը տեղակայել Ջավախքում

«Սիրիան լքող ամերիկյան ուժերը հնարավոր է ուղարկվեն Վրաստան և դառնան «հորիզոնից այն կողմ» ուժը, որը «Իսլամական պետության» վերակազմակերպման դեպքում արագ կարձագանքի: ԱՄՆ-ը կարող է օգտագործել նախկին ռուսական ռազմաբազան Ախալքալաքում, որը Ռաքքայից ընդամենը 740 կմ է հեռու: Այժմ Վրաստանն ավելի հուսալի է, քան Իրաքը»,- ըստ 1tv.ge կայքի՝ իր թվիթերյան էջում գրել է Heritage foundation հիմնադրամի վերլուծաբան Լյուք Քոֆին:

Լյուք Քոֆին բազմիցս է հանդես եկել առաջարկությամբ՝ արագացնել Վրաստանի անդամակցությունը ՆԱՏՕ-ին:

Վրաստանի խորհրդարանի արտաքին հարաբերությունների հանձնաժողովի փոխնախագահ Նինո Գոգուաձեն հայտարարել է, որ դա փորձագետի դիրքորոշումն է ընդամենը, և այն քննարկվում է որպես նրա սեփական առաջարկ: «Վրաստանի շահերից է բխում, որ երկիրն ավելի անվտանգ լինի, դառնա ՆԱՏՕ-ի անդամ: Անշուշտ, մենք ձգտում ենք, որպեսզի Վրաստանը ցանկացած ագրեսիայից էլ ավելի պաշտպանված երկիր լինի»,- Գոգուրաձեի խոսքերն է մեջբերում Aliq.ge կայքը:

Նշենք, որ հոկտեբերի 7-ին ԱՄՆ նախագահ Դոնալդ Թրամփը հայտարարել էր, որ ամերիկյան զորքերը դուրս են բերվելու հյուսիսային Սիրիայի տարածքից, որն էլ կանաչ լույս վառեց Թուրքիայի համար՝ հոկտեմբերի 9-ին սկսելու «Խաղաղության ակունք» ռազմական օպերացիան: Ամերիկյան զորքերը շարժվել էին դեպի Իրաք և տեղակայվել այնտեղ: Իրաքյան բարձրաստիճան զինվորականները հայտարարել էին, որ մոտ 1000 ամերիկյան զինծառայողները չունեն իրենց երկրում գտնվելու թույլտվություն: