Ամօթի այսքան ծանր բեռով ո՞ւր պիտի հասնին Հայաստանի մէջ պետական քաղաքականութեան որոշումները կայացնողները. Վաչէ Բրուտեան

Պարոնայք իշխանաւորներ, մենք ձանձրացանք, իսկ դո՞ւք...

Վարի յղումով պիտի կարդաք, թէ Հայաստանի Կեդրոնական դրամատունը արծաթէ դրամանիշեր հրապարակած է Խոսրովի արգելոցի եւ կովկասեան ընձառիւծի դիմապատկերներով։

Հայաստանի Կեդրոնական դրամատունը լուր իսկ չունեցաւ, որ անցեալ տարի 100ամեակն էր Հայաստանի անկախ հանրապետութեան հիմնադրութեան (28 Մայիս, 1918) եւ հրապարակեց թղթադրամներ Պ. Սեւակի, Այվազովսկիի եւ այլոց նկարներով (իրենց կարգին երախտաւորներ), սակայն ԵՐԲԵ՛Ք՝ այդ անկախութիւնը կերտած սերունդի ներկայացուցիչներու դիմանկարներով։

Այս տարի 100ամեակն է Միացեալ, Ազատ ու Անկախ Հայաստանի պաշտօնական հռչակման։ Այս քաղաքական քայլին հեղինակն էր նորանկախ (հազիւ միամեայ) Հայաստանի Հանրապետութեան կառավարութիւնը։ Անկախ պետականութիւն կերտած սերունդը։

Այս զոյգ հարիւրամեակներու խորապատկերին վրայ՝ կովկասեան ընձառիւծի դիմապատկերով մետաղադրամներ, իբրեւ ազգին նուէր։

Ամօթի այսքան ծանր բեռով ո՞ւր պիտի հասնին Հայաստանի մէջ պետական քաղաքականութեան որոշումները կայացնողները։ Ամօ՛թ։

ՎԱՉԷ ԲՐՈՒՏԵԱՆ