ԵՊՀ-ում պետք է ձեռնամուխ լինենք մաքրելու ժամանակի ընթացքում այս կամ այն պատճառներով կուտակված աղբը. նորանշանակ պրոռեկտոր

ԵՊՀ նորանշանակ պրոռեկտոր Արթուր Իսրայելյանն իր ֆեյսբուքյան էջում գրում է.

«Սիրելի համալսարանականներ,

Շնորհակալ եմ ինձ ուղղված սատարող խոսքերի և սրտացավ վերաբերմունքի համար: Դրանք ինձ վստահություն են տալիս գիտակցելու, որ շարժվում եմ ճիշտ ուղղությամբ և ազնվորեն գործում եմ հանուն համալսարանի զարգացման: Նկատելի է, որ իմ այդ գործելաոճը խանգարում է որոշ շրջանակների, որոնք, ելնելով նեղ անձնական շահերից, փորձում են ընդդիմանալ, և համալսարանականին անվայել, անմակարդակ ու իրականությանը չհամապատասխանող լուրեր տարածել:
Իմ պատվին ու արժանապատվությանը պատճառված վնասներին կանդրադառնամ օրենքով սահմանված իրավակարգավորումների շրջանակում:
Մինչ այդ, ուզում եմ հաստատել, որ լի եմ վճռականությամբ և բարեխղճորեն կատարելու եմ ինձ վստահված ոլորտը զարգացնելու առաքելությունը՝ հանուն մեր համալսարանի բարօրության: Այդպես եմ վարվել երեկ, մեծ ոգևորությամբ դա անում եմ այսօր և անելու եմ վաղը՝ անկախ համալսարանում իմ զբաղեցրած դիրքից:
Երևանի պետական համալսարանը մեր բոլորի տունն է, և մենք միասին ու յուրաքանչյուրս մեր չափով պետք է ձեռնամուխ լինենք մաքրելու մեր տան անկյուններում ժամանակի ընթացքում այս կամ այն պատճառներով կուտակված աղբը, որից տարածվող գարշահոտությունը սկսել է լայն թափով տարածվել համալսարանական միջավայրում և նրանից դուրս: