Ռուսաստանը հաստատել է, որ Ս-400-ների մատակարարումը կավարտվի 2020 թ. գարնանը

Ռուսաստանի Դաշնային ռազմական և տեխնիկական համագործակցության ծառայության նախագահ Դմիտրի Շուգաևը հայտարարել է, որ Ս-400 ՀՕՊ համակարգերի տեղակայումը Թուրքիայում կավարտվի 2020 թ. գարնանը:

«Համակարգերը հաջորդ տարվա գարնանն արդեն տեղակայված կլինեն: Թուրքիայի հետ կնքված համաձայնագիրն իրականացվում է: Ներկայումս համակարգերի երկրորդ խմբաքանակն է մատակարարվում: Մի քանի շաբաթ անց Թուրքիայում կլինի»,- Շուգաևի խոսքերն է մեջբերում «Սպուտնիկ»-ի թուրքական ծառայությունը:

Շուգաևը նաև հայտնել է, որ թուրք մասնագետների ուսուցումը կտևի 2019 թվականի վերջից մինչև 2020 թ. սկիզբը:

Ս-400-ների առաջին խմբաքանակը մատակարարվել էր հուլիսի 12-ից մինչև 27-ը: Երկրորդ խմբաքանակի մատակարարումն էլ սկսվել է օգոստոսի 27-ին: Պահեստամասերը բերող ինքնաթիռները վայրէջք են կատարում Անկարայի մոտակայքում գտնվող «Մյուրթեդ» օդանավակայանում:

Երեկ իսրայելական արբանյակները լուսանկարներ են հրապարակել, որոնցում երևում է, որ հուլիս ամսին մատակարարված Ս-400-ները դեռևս  նույն օդանավակայանում են: