Ինձ համար շատ ավելի համոզիչ է ռեկտորի խոսքը. Ռուբեն Մելիքյան

Արցախի Հանրապետության նախկին ՄԻՊ, փաստաբան Ռուբեն Մելիքյանն իր ֆեյսբուքյան էջում գրում է. «ԵՊԲՀ ռեկտոր Արմեն Մուրադյանին անձամբ ճանաչում եմ։ Այս տարի 1-2 անգամ շփվել ենք՝ Աղաջանովների ընտանիքի հետ կապված հանրային հնչեղության հարցի կապակցությամբ։ Ստացել եմ արժեքներ ունեցող ու սկզբունքային մարդու տպավորություն, որը պատրաստ է «գին վճարել» իր արժեքներին հավատարմության համար։

Առողջապահության նախարար Արսեն Թորոսյանին անձամբ չեմ ճանաչում։ Հանրային լուսաբանումից ստացել եմ դիկտատորական կեցվածք ու ինքնափիառի ընդգծված հակում ունեցող, էպատաժներ սիրող մարդու տպավորություն։

Մեր հաշմանդամ զինծառայողների մասին ուշադիր լսել եմ թե՛ Մուրադյանի «ամբաստանությունը» և թե՛ Թորոսյանի հերքումը։ Պիտի խոստովանեմ, որ «խոսք խոսքի դիմաց» այս իրավիճակում անձամբ ինձ համար շատ ավելի համոզիչ է ռեկտորի խոսքը։