Գիտական կառույցների ֆինանսավորման կարգը կփոխվի

Հայաստանում գիտական հաստատությունները կֆինանսավորվեն իրենց կատարած աշխատանքի արդյունավետությանը համապատասխան. այսօր լրագրողներին հայտնեց ՀՀ ԿԳՄՍ գիտության կոմիտեի նախագահ Սամվել Հարությունյանը և հավելեց` ֆինանսավորման այդ տարբերակն ուժի մեջ կմտնի 2020-ի հունվարի 1-ից:

Նա մանրամասնեց, թե ինչի համար և որքան միավոր կստանա տվյալ հիմնարկը. դա կորոշի ստեղծված հանձնաժողովը, որում գիտական տարբեր կառույցների բարձրակարգ մասնագետներ են: Ըստ Հարությունյանի` հիմնարկների միջև առողջ մրցակցություն կառաջանա, և դա կհանգեցնի բյուջեի բաշխումների ավելի արդար օգտագործման, քան մինչև հիմա է եղել:

«Նման համակարգ կիրառվում է աշխարհի տարբեր առաջատար երկրներում: Ասեմ, որ կան մի քանի տարբեր չափանիշներ, դրանք են՝ տպագրված հոդվածները, միջազգային համագործակցությունը, մանկավարժական գործունեությունը, նորագույն սարքավորումների առկայությունը, ասպիրանտների պաշտպանությունը, շահած գրանտները և այլն: Հասարակագիտական հիմնարկների համար չափանիշները տարբերվելու են: Վստահ եղեք` համեմատելու ենք նմաններին նմանների հետ: Երբեք որևէ մեկի մտքով չանցնի, որ հայագիտությունը ֆիզիկայի հետ ենք համեմատելու»,- շեշտեց Հարությունյանը: