Գյուղնախարարը տեղեկություն չունի՝ ադրբեջանական ծագման քանի ապրանք է ներմուծվել Հայաստան

«Ելք» խմբակցության պատգամավոր Մանե Թանդիլյանը ՀՀ գյուղնախարար Իգնատի Առաքելյանին հարց ուղղեց հայկական շուկայում պարբերաբար հայտնվող` ադրբեջանական փաթեթավորման գյուղատնտեսական ապրանքների մասին: Պատգամավորը հետաքրքրվեց՝ արդյո՞ք կա վիճակագրություն, թե 2016 թվականին ադրբեջանական ծագման քանի ապրանք է ներմուծվել Հայաստան, և ինչպե՞ս են վերահսկվում դրանք:

«Տվյալների մասին տեղեկություն չունեմ, բայց ՀՀ-ն պետք է իր քաղաքականությունն ունենա, թե որ երկրից իրավունք ունի ներմուծելու, որից՝ ոչ: Քանի այդ քաղաքականությունը հստակեցված չէ,  օրենքի սահմաններում այդ երկրներից կարող են մթերքներ ներմուծվել: Կարևորը` դա օրինական լինի»,- ասաց նախարարը:

Պատգամավորը նշեց, որ ինքը չստացավ իր հարցի պատասխանը՝ պնդելով, որ ստացվում է` հասարակությունն օգտվում է ադրբեջանական ծագում ունեցող ապրանքներից:

«Ըստ մամուլի՝ այդպես է ստացվում»,- պատասխանեց նախարարը: