Թրամփը չի ցանկանում Թուրքիայի նկատմամբ պատժամիջոցներ կիրառել. Wall Street Journal

Ամերիկյան Wall Street Journal օրաթերթի համաձայն` ԱՄՆ նախագահ Դոնալդ Թրամփն իր խորհրդականներին ասել է, որ չի ցանկանում պատժամիջոցներ կիրառել Թուրքիայի նկատմամբ և  այդ կապակցությամբ երաշխիք է տվել Թուրքիայի նախագահ Ռեջեփ Թայիփ Էրդողանին. հաղորդում է t24.com.tr կայքը:

ԱՄՆ Սենատը կոշտ էր արձագանքել Թուրքիայի` Ռուսաստանից գնված Ս-400 ՀՕՊ համակարգերի մատակարարմանը և արագացրել Թուրքիայի նկատմամբ պատժամիջոցներ կիրառելու քայլերը: Սենատորներ Ռիք Սքոթը և Թոդ Յանգը անցյալ շաբաթ Թուրքիային քննադատող և Թուրքիայի նկատմամբ պատժամիջոցներ կիրառելու կոչ անող օրինագիծ էին ներկայացրել:

Wall Street Journal-ը նշում է, որ Թրամփի ազգային անվտանգության հարցերով խորհրդական Ջոն Բոլթոնն ասել է, թե ՆԱՏՕ անդամ մի շարք երկրներ այս շաբաթվա առաջին օրերին պատժամիջոցներ կկիրառեն Թուրքիայի նկատմամբ:

Wall Street Journal-ի թղթակիցներ Վիվիեն Սալաման և Յան Թալլին հայտնում են, որ Թրամփը կողմնակից չէ պատժամիջոցներին, մինչդեռ Բոլթոնն ու պետքարտուղար Մայք Պոմպեոն նշում են, որ դա  անհրաժեշտություն է: