Սուպերնախարարությանը մոտ 375 մլն դրամ հատկացվեց

Կրթության, գիտության, մշակույթի և սպորտի նախարարությանը 374 մլն 858 հազար դրամ՝ կհատկացվի: Որոշումն ընդունվեց  կառավարության այսօրվա նիստում:

Նշվեց, որ միջոցները կտրամադրվեն բյուջեի եկամուտների ավելացման հաշվին:

Ըստ որոշման` գումարներ կհատկացվեն «Մասիսի թիվ 5 ավագ դպրոց» ՊՈԱԿ-ի, «Ալավերդու Սայաթ-Նովայի անվան թիվ 8 ավագ դպրոց» ՊՈԱԿ-ի, «Երևանի թիվ 109 ավագ դպրոց» ՊՈԱԿ-ի, «Երևանի Կ․ Դեմիրճյանի անվան թիվ 139 ավագ դպրոց» ՊՈԱԿ-ի, «Հրազդանի թիվ 10 ավագ դպրոց» ՊՈԱԿ-ի վերակառուցման, թվով 6 ավագ դպրոցների շենքային պայմանների բարելավման, նախագծման, նոր մարզադահլիճների կառուցման կարիք ունեցող 10 հանրակրթական դպրոցների և մարզադահլիճների շենքային պայմանների բարելավման կարիք ունեցող 40 հանրակրթական դպրոցների նախագծանախահաշվային փաստաթղթերի մշակման, նախագծանախահաշվային փաստաթղթերի փորձաքննության, շենքերի տեխնիկական վիճակի հետազննության աշխատանքներ իրականացնելու համար։

21 մլն 339 հազար դրամ էլ կհատկացվի 3 մանկապատանեկան մարզադպրոցների շենքային պայմանների բարելավման համար, այդ թվում՝ «Հրանտ Շահինյանի անվան սպորտային, գեղարվեստական մարմնամարզության և ակրոբատիկայի օլիմպիական մանկապատանեկան մարզադպրոց» ՊՈԱԿ-ի մետաղասարքավորումներով մարզադահլիճի  կառուցման, «Հեծանվային սպորտի օլիմպիական մանկապատանեկան մարզադպրոց»  ՊՈԱԿ-ի մարզակառույցի  վերակառուցման, «Թիավարության մարզաձևերի օլիմպիական մանկապատանեկան մարզադպրոց» ՊՈԱԿ-ի մարզադահլիճի և վարչական տարածքի վերակառուցման: