Պոմպեոն խոստացել է Իրանի դեմ ապացույցներ ներկայացնել և չի բացառել ռազմական դիմակայությունը

Վաշինգտոնը չի կասկածում, որ  Իրանը կապ ունի Օմանի ծոցում նավթատար նավերի վրա հարձակման հետ, և մտադիր է ներկայացնել դրա ապացույցները: Այդ մասին ԱՄՆ պետքարտուղար Մայք Պոմպեոն ասել է Fox News-ի եթերում. հայտնում է ТАСС-ը:

«Ակնհայտ է` այնտեղ ինչ է կատարվել»,- ասել է նա:

Ըստ Պոմպեոյի` դրանք հարձակումներ են եղել Իրանի Իսլամական Հանրապետության կողմից: «Որևէ կասկածներ դրանում չկան: Հետախուզական տվյալներ և ապացույցներ կան: Աշխարհը կտեսնի դրանց մեծ մասը»,- հավելել է նա:

Բացի այդ` CBS-ի հետ զրույցում Պոմպեոն  խոսել է Իրանին զսպելու մասին: Հարցին` ԱՄՆ-ն դիտարկո՞ւմ է ռազմական դիմակայության հնարավորություն, նա պատասխանել է. «Իհարկե»:

Պոմպեոյի խոսքով, սակայն, ԱՄՆ նախագահ Դոնալդ Թրամփը հստակ հասկացրել է, որ չի ցանկանում պատերազմի գնալ:

Հիշեցնենք, որ Օմանի ծոցում հարձակում է տեղի ունեցել երկու նավթատար նավերի վրա, նավաստիները փրկված են: Խոսքը Front Altair (Նորվեգիա) և Kokuka Courageous (Պանամա) նավերի մասին է: