Համանախագահները ԼՂ հակամարտության կողմերին կներկայացնեն գերիների վերաբերյալ առաջարկներ. ՌԴ ԱԳՆ

ԵԱՀԿ Մինսկի խմբի համանախագահները մայիսի վերջին տարածաշրջան կատարելիք այցի շրջանակում ԼՂ  հակամարտության կողմերին կներկայացնեն գերիների վերաբերյալ առաջարկներ: Այս մասին ադրբեջանական Trend-ին հայտնել են Ռուսաստանի Դաշնության ԱԳՆ-ից՝ պատասխանելով ԱԳ նախարար Սերգեյ Լավրովի՝ «Բոլորին` բոլորի դիմաց» սկզբունքով գերիների փոխանակման վերաբերյալ հայտարարության մասին հարցին:

ՌԴ ԱԳՆ-ից հիշեցրել են, որ 2010-ի հոկտեմբերին Աստրախանում կայացած եռակողմ հանդիպման ժամանակ ՌԴ, ՀՀ և Ադրբեջանի նախագահների միջև ռազմական ոլորտում վստահության ամրապնդմանն ուղղված քայլերի հարցն է քննարկվել:

«Այս նպատակով պայմանավորվածություն է ձեռք բերվել ԵԱՀԿ Մինսկի խմբի համանախագահների և Կարմիր խաչի միջազգային կոմիտեի ներկայացուցիչների աջակցությամբ գերիների փոխանակման վերաբերյալ: Բաքուն և Երևանը պայմանավորվել են ապագայում առաջնորդվել այդ մոտեցմամբ` բացառապես ելնելով նման հարցերի մարդասիրական բնույթից: Ենթադրում ենք, որ այս պայմանավորվածությունը պահպանում է իր արդիականությունը: Գերիների փոխանակման հարցի շուրջ խորհրդակցությունները շարունակվում են»,- հայտնել են ԱԳՆ-ից:

Նաև մանրամասնել են, որ  Հայաստանի և Ադրբեջանի ԱԳ նախարարները վերջերս կայացած հանդիպման ժամանակ պատրաստակամություն են հայտնել փոխադարձ հիմքով քայլեր ձեռնարկել գերիների հարազատներին նրանց մոտ թողնելու ուղղությամբ: «Համանախագահներն այդ առումով առաջարկներ են մշակել, որոնք տարածաշրջան այցի ժամանակ կփոխանցեն կողմերին»,- հայտնել են գերատեսչոթյունից: