Համահայկական օրակարգերի խորհրդակցություն-քննարկում

Լիբանանահայ գաղութի հաստատութիւններու եւ միութենական շրջանակներու հետ կայացած հանդիպումներու շրջագիծին մէջ, ՀՅԴ Բիւրոյի ներկայացուցիչ Յակոբ Տէր Խաչատուրեան ճանաչողական հանդիպում ունեցաւ լիբանանահայ հասարակական եւ գործարարական մարզերու մէջ յայտնի կարգ մը ծանօթ անձնաւորութիւններու հետ:

Հանդիպումը նախաձեռնած էր նախկին նախարար Վրէժ Սապունճեան, որ իր տան մէջ հիւրընկալեց հանդիպումին մասնակիցները:

Ընթրիք-հանդիպումի ընթացքին կայացան միտքի փոխանակումներ, եղան խորհրդակցութիւններ, ներկայացուեցան պատկերացումներ եւ առաջարկներ համահայկական օրակարգերու` Հայ դատի դիմագրաւած խնդիրներուն, Հայաստան-սփիւռք համագործակցութեան եւ հայկական գործօնի միացեալ նախաձեռնութիւններով ուժեղացման առաջադրանքին մասին:

Ներկաները շեշտեցին կայացած հանդիպումին շինիչ եւ կառուցողական բնոյթը` շեշտելով ներկայ պայմաններուն մէջ համազգային հարցերը միասնաբար քննարկելու համար նման խորհրդակցութիւններու շարունակութեան հրամայականը: