DJ լինելը, իհարկե, ամոթ չէ, ուղղակի Աղաջանյանը կառավարման ոլորտում փորձ չունի

Լրագրողները սահմանապահ զորքերին նվիրված միջոցառումից հետո վարչապետ Նիկոլ Փաշինյանից հետաքրքրվեցին` արդյո՞ք գործադիրում աշխատող պաշտոնյաներն իր իսկ կողմից նախանշած պահանջներին ու որակներին համապատասխանում են: Հիշեցնենք, որ օրերս վարչապետը ԵՊՀ-ում ուսանողության հետ հանդիպման ժամանակ ասել էր, թե 22 տարեկանում պետք է 3 լեզու իմանալ և ունենալ առնվազն 3 տարվա աշխատանքային ստաժ:

Լրագրողներն ավելի մասնավորեցրին հարցը` օրինակ՝ գո՞հ է վարչապետի աշխատակազմի ղեկավար Էդուարդ Աղաջանյանից կամ Արարատի մարզպետ Գարիկ Սարգսյանից:

Հարցը զարմացրեց Փաշինյանին` իսկ ինչո՞ւ պետք է գոհ չլինի։

Լրագրողները մեկնեցին` հաշվի առնելով հանգամանքը, որ, օրինակ, Էդուարդ Աղաջանյանը կառավարման համակարգում աշխատանքային ստաժ չուներ և «դիջեյ» էր աշխատում:

«Իսկ դիջեյ լինելն ամո՞թ է: Մոնակոյի համալսարանն է ավարտել Էդուարդ Աղաջանյանը, Գարիկ Սարգսյանը ժողովրդավարական ճանապարհով ընտրված գյուղապետ է եղել. հանրապետությունում տասնյակ տարիներով էդպիսի բան տեղի չի ունեցել։ Ի՞նչն է պրոբլեմը: Եկեք քննարկենք։ Որ ասում եք՝ գոհ եք, թե դժգոհ, ի՞նչ են արել էդ մարդիկ։ Եթե բան են արել, կտանենք, կդատենք»,- այսպես արձագանքեց Փաշինյանը: